اسلام آباد: آئی ایم ایف نے شارٹ فال پورا کرنے کے لیے منی بجٹ لانے کا مطالبہ کردیا تاہم وزیراعظم شہباز شریف نے مطالبہ مسترد کرتے ہوئے متبادل پلان کی ہدایت کردی۔تفصیلات کے مطابق جولائی سے دسمبر تک ٹیکس ہدف میں 385 ارب روپے کا شارٹ فال ہے جس کے بعد آئی ایم ایف نے ریونیو شارٹ فال پورا کرنے کے لیے منی بجٹ لانے کا مطالبہ کردیا۔ذرائع کا کہنا ہے کہ اس حوالے سے پاکستان اور آئی ایم ایف کے درمیان اقتصادی صورتحال پر رابطہ ہوا ہے۔وزیراعظم نے آئی ایم ایف کی جانب سے منی بجٹ لانے کی تجویز کو مسترد کرتے ہوئے ایف بی آر کو متبادل پلان کے ساتھ ریونیو شارٹ فال پورا کرنے کی ہدایت کی ہے۔ایف بی آر ذرائع کا کہنا ہے کہ ریونیو شارٹ فال پورا کرنے کے لیے پلان آئی ایم ایف سے شیئر کیا گیا ہے، بندرگاہ پر پھنسے کنٹینرز اور دیگر شپمنٹس کو فوری طور پر کلیئر کر دیا جائے گا، فوری شپمنٹ کی کلیئرنس سے ٹیکسز اور ڈیوٹیز میں اضافہ ہوگا۔متبادل منصوبے کے تحت اسمگل شدہ اشیا کی فوری نیلامی کے لیے ہنگامی اقدامات کیے جائیں گے اور ٹیکس چوروں کے خلاف نفاذ کی صلاحیت کو بہتر بنایا جائے گا۔ذرائع نے بتایا ہے کہ پلان کے مطابق انڈر ٹیکس سیکٹر سے ٹیکس وصولی کو بہتر کیا جائے گا، ٹیکس سے متعلق عدالتوں میں مقدمات جلد نمٹائے جائیں گے۔ذرائع کا کہنا ہے کہ آئی ایم ایف کے وفد کی آمد سے قبل ان تمام اقدامات پر پیش رفت کی جائے گی۔ جنوری میں ایف بی آر کو 960 ارب کا ٹیکس ہدف حاصل کرنا ہو گا۔ذرائع کے مطابق کمی کو پورا کرنے کے لیے متبادل پلان پر عملدرآمد مارچ تک مکمل کرنا ہوگا۔
