افغان حکومت اپنی ذمہ داری پوری کرے، ژوب میں ہلاک دہشتگرد افغانی تھا، آئی ایس پی آر

آئی ایس پی آر کا کہنا ہے کہ بلوچستان کے ضلع ژوب کے سرحدی علاقے سمبازہ میں مارا گیا دہشت گرد افغان شہری تھا۔پاک فوج کے شعبہ تعلقات عامہ (آئی ایس پی آر) کے مطابق 11 جنوری کو بلوچستان کے ضلع ژوب کے سرحدی علاقے سمبازہ میں دہشت گردی میں ملوث افغان شہری کو ہلاک کردیا گیا تھا۔دہشت گرد کی شناخت محمد خان احمد خیل ولد حاجی قاسم دوراں خان کے نام سے ہوئی ہے اور وہ افغانستان کے صوبہ پکتیکا کے ضلع وزیر کھو کے گاؤں بلورائی کا رہائشی ہے۔ان کی لاش کو ضروری قانونی کارروائی مکمل کرنے کے بعد 20 جنوری کو عبوری افغان حکومت کے حکام کے حوالے کر دیا گیا۔یہ واقعہ افغان شہریوں کے پاکستان میں دہشت گردی میں ملوث ہونے کا ناقابل تردید ثبوت ہے۔توقع ہے کہ عبوری افغان حکومت اپنی ذمہ داریاں پوری کرے گی اور دہشت گردوں کو پاکستان کے خلاف دہشت گردی کی کارروائیوں کے لیے افغان سرزمین استعمال کرنے سے روکے گی۔