سابق صدر عارف علوی نے کہا ہے کہ 9 مئی کے معاملے پر جبر کرنا ہے تو مذاکرات کا کیا فائدہ۔کراچی میں سندھ ہائی کورٹ میں میڈیا سے گفتگو کرتے ہوئے انہوں نے کہا کہ ہمیں ملکی معاملات خود ٹھیک کرنے ہیں، ٹرمپ اپنے ملک سمیت دنیا میں ڈیپ اسٹیٹ کی مداخلت نہیں چاہتے۔عارف علوی نے کہا کہ پاکستان بہت اہم ملک ہے، ہمیں جمہوریت کے ذریعے تبدیلی لانی ہے، معیشت سمیت کسی شعبے میں بہتری نہیں آئی، مشرق وسطیٰ سے سرمایہ کاری کے خواب پورے نہیں ہوئے۔رہنما تحریک انصاف کا کہنا تھا کہ غریب مزید غریب ہوگیا، ڈھائی کروڑ سے زائد بچے اسکولوں سے باہر ہیں، حکومت کی تبدیلی سے ملک کو 50 ارب روپے کا نقصان ہوا ہے۔سابق صدر ڈاکٹر عارف علوی نے کہا کہ جی ڈی پی گروتھ 6 سے کم ہوکر 3 فیصد سے بھی کم ہوگئی، حکومت کے پاس اپنا ڈی سی بھی لگانے کا اختیار نہیں۔
