حکومت نے تحریک انصاف کے ساتھ مذاکراتی عمل آگے بڑھانے کا فیصلہ کرلیا، حکومتی اتحاد کی مذاکراتی کمیٹی کی جانب سے مشترکہ لائحہ عمل تیار کرنے کے بعد مذاکراتی کمیٹیوں کا چوتھا اجلاس آئندہ ہفتے بلائے جانے کا امکان ہے۔ذرائع کے مطابق وزیراعظم شہبازشریف سے مسلم لیگ (ن) کے ارکان نے ملاقات کی ہے، حکومتی مذاکراتی کمیٹی میں نائب وزیراعظم اسحاق ڈار،ملاقات میں رانا ثنا اور سینیٹر عرفان صدیقی نے وزیراعظم کو تحریک انصاف کے مطالبات کے حوالے سے باضابطہ بریفنگ دی اور آئندہ کے لیے رہنمائی مانگی۔ذرائع کے مطابق وزیراعظم نے کمیٹی کو ہدایت کی کہ وہ مذاکراتی عمل کو جاری رکھے اور باقی چھ اتحادی جماعتوں کے ارکان کے ساتھ مشترکہ موقف بنائے۔ذرائع کا کہنا ہے کہ حکومتی مذاکراتی کمیٹی کے تمام ارکان جلد ملاقات کریں گے اور پی ٹی آئی کے مطالبات کے حوالے سے اپنا لائحہ عمل تیار کریں گے۔پیپلز پارٹی کی جانب سے فاروق ایچ نائیک اور حکومت کی جانب سے اعظم نذیر ترابی اپنی رپورٹ کمیٹی کو دیں گے۔حکومتی کمیٹی کی جانب سے مشترکہ موقف تیار کرنے کے بعد مذاکراتی کمیٹیوں کا چوتھا اجلاس 27 یا 28 جنوری کو بلایا جا سکتا ہے۔
