وزیراعظم محمد شہباز شریف چین کا سرکاری دورہ مکمل کرنے کے بعد وطن واپس روانہ ہوگئے۔ بیجنگ کے کیپیٹل انٹرنیشنل ایئرپورٹ پر پیپلز پولیٹیکل کنسلٹیٹو کانفرنس کی بیجنگ میونسپل کمیٹی کی رکن ہین زیرونگ، چین میں پاکستان کے سفیر خلیل ہاشمی اور سفارتی عملے نے انہیں الوداع کیا۔
اپنے قیام کے دوران وزیراعظم نے تیانجن میں شنگھائی تعاون تنظیم (ایس سی او) کے سربراہان مملکت کے 25ویں اجلاس اور ایس سی او پلس اجلاس میں شرکت کی۔ وہ فاشزم کے خلاف عالمی جنگ کی 80ویں سالگرہ کی تقریبات میں بھی شریک ہوئے۔
وزیراعظم نے چین کے صدر اور وزیراعظم کے علاوہ روس، ایران، ترکیہ، آذربائیجان اور تاجکستان کے سربراہان سے دو طرفہ ملاقاتیں کیں، جن میں باہمی تعاون، خطے کی صورتحال اور اقتصادی روابط پر بات چیت کی گئی۔
شہباز شریف نے بیجنگ میں منعقدہ دوسری پاک–چین بزنس ٹو بزنس کانفرنس میں بھی شرکت کی، جہاں دونوں ممالک کے کاروباری و سرمایہ کار حلقوں کے ساتھ تجارتی تعلقات اور سرمایہ کاری کے فروغ پر تبادلہ خیال کیا گیا۔
