پاکستان اسٹاک ایکسچینج (پی ایس ایکس) میں جمعرات کو غیر معمولی تیزی دیکھنے میں آئی اور بینچ مارک کے ایس ای-100 انڈیکس کاروبار کے دوران 1,53,411 پوائنٹس کی بلند ترین سطح تک پہنچ گیا۔ دن کے اختتام پر انڈیکس 463 پوائنٹس اضافے کے ساتھ 1,52,665 پر بند ہوا، جو مارکیٹ کی تاریخ کی نئی ریکارڈ سطح ہے۔
ماہرین کے مطابق تیزی کے اس رجحان میں اسٹیٹ بینک کی جانب سے معیشت کی 3.25 سے 4.25 فیصد جی ڈی پی گروتھ کی پیش گوئی، سی پیک فیز 2.0 سے متعلق توقعات اور مختلف شعبوں کی مضبوط کارکردگی نے اہم کردار ادا کیا۔
سیمنٹ اور کھاد کے شعبوں نے سرمایہ کاروں کی توجہ حاصل کی۔ اگست میں سیمنٹ ڈسپیچز 12 فیصد اور یوریا کی فروخت 46 فیصد بڑھنے سے مارکیٹ میں نمایاں تیزی آئی۔ حب پاور نے توقع سے زیادہ آمدنی اور فی شیئر 10 روپے ڈیویڈنڈ کا اعلان کر کے انڈیکس میں 405 پوائنٹس کا اضافہ کیا، جب کہ فوجی فرٹیلائزر، او جی ڈی سی، ماری پیٹرولیم اور پاکستان پیٹرولیم نے بھی انڈیکس کو سہارا دیا۔
کاروبار کے دوران 9 کروڑ 53 لاکھ سے زائد حصص کا لین دین ہوا، جس کی مالیت 46 ارب روپے سے زیادہ رہی۔ اگرچہ مجموعی حجم میں معمولی کمی دیکھی گئی، لیکن سرمایہ کاروں کا اعتماد مثبت رہا۔
ماہرین کا کہنا ہے کہ برآمدات میں کمی اور حالیہ سیلاب کے باوجود مارکیٹ کا تسلسل کے ساتھ بلند سطح پر جانا مستقبل کے بارے میں سرمایہ کاروں کے اعتماد کو ظاہر کرتا ہے، تاہم عالمی مانگ میں کمی اور تجارتی خسارہ بدستور چیلنج ہیں۔
