پشاور: خیبر پختونخوا حکومت نے افغانستان میں زلزلے سے متاثرہ خاندانوں کی فوری امداد کے لیے 35 ٹرک امدادی سامان افغان حکومت کو فراہم کر دیا ہے۔ اس امدادی سامان میں دو ٹرک ادویات بھی شامل ہیں تاکہ متاثرین کی طبی ضروریات کو بھی پورا کیا جا سکے۔
پشاور میں پی ڈی ایم اے وئیر ہاؤس میں منعقدہ تقریب میں افغان قونصل جنرل حافظ محب اللہ، معاون خصوصی برائے ریلیف نیک محمد اور چیف سیکرٹری خیبر پختونخوا شہاب علی شاہ نے شرکت کی۔ اس موقع پر امدادی سامان کی باقاعدہ حوالگی کی گئی۔
امدادی سامان میں 500 ٹینٹ (سرد موسم سے بچاؤ کے لیے)، 500 فیملی سائز ٹینٹ، ایک ہزار ترپال، 500 کمبل، 1500 رضائیاں، 1500 گدے اور 3000 تکیے شامل ہیں۔ یہ سامان متاثرہ خاندانوں کو موسم کی سختیوں سے بچانے اور ان کی فوری ضروریات پوری کرنے کے لیے فراہم کیا گیا ہے۔
چیف سیکرٹری خیبر پختونخوا نے کہا کہ صوبائی حکومت اس مشکل وقت میں اپنے افغان بھائیوں کے ساتھ کھڑی ہے اور ریلیف، تعاون اور مدد کا سلسلہ متاثرہ خاندانوں کی مکمل بحالی تک جاری رہے گا۔
افغان قونصل جنرل حافظ محب اللہ شاکر نے خیبر پختونخوا حکومت کی اس کاوش کو سراہتے ہوئے کہا کہ یہ امداد دونوں برادر ممالک کے درمیان خیر سگالی اور بھائی چارے کے رشتے کو مضبوط کرنے کی عکاسی کرتی ہے۔ انہوں نے پاکستانی عوام اور حکومت کا شکریہ ادا کرتے ہوئے اسے ایک قابلِ قدر اور بروقت اقدام قرار دیا۔
