پشاور (نمائندہ خصوصی) — خیبرپختونخوا کے دارالحکومت پشاور اور اس کے گردونواح میں موسلا دھار بارش کے باعث معمولاتِ زندگی شدید متاثر ہو گئے ہیں۔ بارش کے نتیجے میں نشیبی علاقے زیر آب آ گئے، جبکہ شہر کے مختلف حصوں میں پانی جمع ہونے سے ٹریفک کی روانی شدید متاثر ہوئی۔
بی آر ٹی سروس عارضی طور پر معطل
شدید بارش کے باعث فیڈر روٹس پر پانی کھڑا ہو گیا، جس کے باعث بس ریپڈ ٹرانزٹ (بی آر ٹی) سروس کو فوری طور پر معطل کر دیا گیا ہے۔
ترجمان ٹرانس پشاور کے مطابق، سروس کی بندش کا فیصلہ مسافروں کی حفاظت کے پیش نظر کیا گیا ہے۔ ترجمان نے مزید بتایا کہ:
"بی آر ٹی سروس اگلی اطلاع تک مکمل طور پر بند رہے گی۔ صورتحال بہتر ہوتے ہی سروس کی بحالی سے متعلق عوام کو آگاہ کیا جائے گا۔”
شہریوں کو مشکلات، نشیبی علاقے زیرِ آب
شہر کے نشیبی علاقوں میں بارش کا پانی گھروں اور دکانوں میں داخل ہو گیا ہے، جس سے شہریوں کو شدید پریشانی کا سامنا ہے۔ متعدد علاقوں میں ٹریفک جام ہو گیا، اور لوگوں کو گھنٹوں تک گاڑیوں میں محصور رہنا پڑا۔
محکمہ موسمیات کے مطابق، آئندہ 24 گھنٹوں کے دوران مزید بارش کا امکان ہے، جس کے پیشِ نظر شہریوں کو احتیاطی تدابیر اختیار کرنے کی ہدایت کی گئی ہے۔
