قومی بیٹر آصف علی نے بین الاقوامی کرکٹ کو خیرباد کہہ دیا

لاہور (اسپورٹس ڈیسک) — پاکستان کرکٹ ٹیم کے مڈل آرڈر بیٹر آصف علی نے انٹرنیشنل کرکٹ سے ریٹائرمنٹ کا اعلان کر دیا ہے۔ انہوں نے یہ اعلان سوشل میڈیا کے ذریعے کیا، جہاں انہوں نے پاکستان کی نمائندگی کو اپنے کیریئر کا سب سے بڑا اعزاز قرار دیا۔

سماجی رابطے کی ویب سائٹ پر جاری بیان میں آصف علی نے کہا:

"الحمدللہ، پاکستان کی جرسی پہننا میرے لیے سب سے بڑا وقار رہا ہے، اور میدان میں ملک کی نمائندگی کرنا میری زندگی کا سب سے فخریہ باب ہے۔”

انہوں نے اپنے مداحوں، کوچز، اور ٹیم کے ساتھیوں کا شکریہ ادا کیا جنہوں نے ہر مرحلے پر ان پر اعتماد کیا اور ان کا ساتھ دیا۔

آصف علی نے اپنے بیان میں اپنے خاندان اور قریبی دوستوں کا خصوصی ذکر کیا، خاص طور پر ان دنوں کا جب وہ ورلڈ کپ کے دوران اپنی کمسن بیٹی کے انتقال کے کرب سے گزرے۔ ان کا کہنا تھا کہ ان مشکل لمحات میں ان کے عزیزوں کا ساتھ ان کے لیے حوصلے کا باعث بنا۔

ڈومیسٹک اور لیگ کرکٹ جاری رکھنے کا اعلان

ریٹائرمنٹ کے اعلان کے ساتھ آصف علی نے یہ بھی واضح کیا کہ وہ ڈومیسٹک کرکٹ اور دنیا بھر کی ٹی ٹوئنٹی لیگز میں کھیلنا جاری رکھیں گے۔

کریئر پر ایک نظر

30 سالہ آصف علی نے پاکستان کی جانب سے:

21 ون ڈے انٹرنیشنلز

58 ٹی ٹوئنٹی انٹرنیشنلز میں شرکت کی۔
انہوں نے کئی مواقع پر میچ وننگ اننگز کھیلیں، خاص طور پر ٹی ٹوئنٹی فارمیٹ میں ان کی چھکے مارنے کی صلاحیت نے انہیں شہرت دی۔

مداحوں کا ردِعمل

سوشل میڈیا پر کرکٹ شائقین اور سابق کرکٹرز کی جانب سے آصف علی کو ان کی خدمات پر خراجِ تحسین پیش کیا جا رہا ہے، اور ان کے کیریئر کی جھلکیوں کو یاد کیا جا رہا ہے۔