سہ فریقی سیریز: محمد حارث غصے میں بلا توڑ بیٹھے، ویڈیو سوشل میڈیا پر وائرل

ابوظہبی: سہ فریقی ٹی ٹوئنٹی سیریز میں پاکستان اور یو اے ای کے درمیان کھیلے گئے میچ میں نوجوان بیٹر محمد حارث جذبات پر قابو نہ رکھ سکے اور جلد آؤٹ ہونے پر غصے میں اپنا بلا توڑ دیا۔

پاکستان نے میچ میں 207 رنز کا بڑا مجموعہ ترتیب دے کر 31 رنز سے کامیابی حاصل کی، تاہم محمد حارث ایک بار پھر صرف 1 رن بنا کر پویلین لوٹ گئے۔

سیریز کے پہلے میچ میں بھی کارکردگی متاثرکن نہ ہونے کے باعث وہ پہلے ہی دباؤ کا شکار تھے۔ آؤٹ ہونے کے بعد غصے میں بلا توڑنے کی ویڈیو سوشل میڈیا پر وائرل ہو گئی، جس پر شائقین کی جانب سے شدید ردعمل سامنے آ رہا ہے۔

شائقین کا ردعمل

مداحوں نے نوجوان کھلاڑی کی اس حرکت کو غیر پیشہ ورانہ اور نقصان دہ مثال قرار دیا۔ سوشل میڈیا پر کئی صارفین نے مشورہ دیا کہ کھلاڑیوں کو میدان میں ضبط اور تحمل کا مظاہرہ کرنا چاہیے، خاص طور پر جب وہ قومی ٹیم کی نمائندگی کر رہے ہوں۔

ٹیم مینجمنٹ کی توجہ

ذرائع کے مطابق ٹیم مینجمنٹ نے بھی اس واقعے کا نوٹس لے لیا ہے اور امکان ہے کہ محمد حارث کو آئندہ ایسے رویے سے باز رہنے کی تنبیہ کی جائے گی۔