اسلام آباد / انقرہ: ترکی کی خاتونِ اوّل امینہ اردوان نے پاکستان میں حالیہ سیلابی صورتحال پر گہرے رنج و غم کا اظہار کیا ہے اور سوشل میڈیا پلیٹ فارم ایکس (سابقہ ٹوئٹر) پر جاری اپنے پیغام میں پاکستانی عوام سے بھرپور ہمدردی کا اظہار کیا ہے۔
انہوں نے اپنے جذباتی پیغام میں یاد دلایا کہ 2010ء کے تباہ کن سیلاب کے دوران وہ خود پاکستان آئی تھیں اور متاثرین کی حالت زار کو قریب سے دیکھا تھا۔ ان کا کہنا تھا کہ اُس وقت بھی ترکی نے فوری طور پر پاکستان کی مدد کی تھی اور آج بھی ترک عوام کے دل پاکستانیوں کے ساتھ دھڑکتے ہیں۔
"ترک ہلالِ احمر متاثرہ علاقوں میں متحرک ہے”
امینہ اردوان نے بتایا کہ ترک ہلال احمر (Turkish Red Crescent) متاثرہ علاقوں میں حالات کا بغور جائزہ لے رہا ہے اور متاثرین کے لیے صحت، خوراک، پینے کے پانی اور عارضی رہائش جیسے بنیادی وسائل کی فوری فراہمی پر کام کر رہا ہے۔
دعائیں، ہمدردی اور عالمی برادری سے اپیل
خاتونِ اوّل نے سیلاب کے باعث جاں بحق ہونے والے افراد کے لیے دعا کی اور زخمیوں کی جلد صحت یابی کی خواہش کا اظہار کیا۔ انہوں نے عالمی برادری سے بھی اپیل کی کہ "ان مشکل لمحات میں پاکستان کی مدد کے لیے آگے بڑھیں تاکہ یکجہتی اور انسانیت کے جذبے کے تحت متاثرین کے دکھوں کا مداوا کیا جا سکے۔”
یہ بیان نہ صرف پاکستان اور ترکی کے مضبوط دوستانہ تعلقات کی عکاسی کرتا ہے بلکہ انسانیت، ہمدردی اور بین الاقوامی یکجہتی کی ایک روشن مثال بھی پیش کرتا ہے۔
