کینسر سے بہادری سے لڑنے والی ٹک ٹاک اسٹار نتاشا ایلن 28 سال کی عمر میں چل بسیں
لندن (انٹرنیشنل ڈیسک) — ٹک ٹاک کی معروف اسٹار اور سوشل میڈیا انفلوئنسر نتاشا ایلن 28 سال کی عمر میں سنوویئل سارکوما (کینسر کی ایک نایاب قسم) سے جنگ لڑتے ہوئے 22 اگست کو انتقال کر گئیں۔
نتاشا ایلن نہ صرف ایک دلیر لڑکی تھیں، بلکہ انہوں نے اپنی بیماری کو دنیا سے چھپانے کے بجائے سوشل میڈیا پر کھل کر شیئر کیا۔ انہوں نے اپنی کینسر سے لڑائی کو ہنسی مذاق اور مثبت طرزِ زندگی کے ساتھ پیش کرتے ہوئے ہزاروں دلوں کو متاثر کیا۔
اہل خانہ کا جذباتی بیان
نتاشا کے اہلِ خانہ نے سوشل میڈیا پر ان کے انتقال کی اطلاع دیتے ہوئے لکھا:
"نتاشا ایک خوبصورت روح تھی جو پیار، مہربانی اور خوشی سے بھری ہوئی تھی۔ اُس نے بے شمار دلوں کو چھو لیا۔ وہ سائنوویئل سارکوما سے متعلق آگاہی کی ایک روشن مثال تھی، اور اس کی روح اُن تمام لوگوں کو ہمیشہ متاثر کرتی رہے گی جنہیں اسے جاننے کا اعزاز حاصل ہے۔”
بیماری کی تشخیص اور آگاہی مہم
سال 2020 میں نتاشا کے گھٹنے میں مہلک رسولی کی تشخیص ہوئی، جو جلد ہی بڑھ کر اسٹیج فور کینسر میں تبدیل ہو گئی۔ ڈاکٹروں کے مطابق اس قسم کے کینسر میں زندہ بچنے کے امکانات محض 15 فیصد ہوتے ہیں۔
لیکن نتاشا نے ہمت نہیں ہاری۔ اس نے ٹک ٹاک اور انسٹاگرام جیسے پلیٹ فارمز پر بے خوفی سے اپنی حالت کو اجاگر کیا اور سائنوویئل سارکوما جیسے کم معروف مگر جان لیوا مرض کے بارے میں شعور بیدار کیا۔
ایک مشعلِ راہ
نتاشا ایلن صرف ایک متاثر کن انفلوئنسر نہیں بلکہ کینسر سے لڑنے والے ہزاروں مریضوں کے لیے امید کی کرن تھیں۔ ان کی زندگی اور جدوجہد مستقبل میں بھی لوگوں کو حوصلہ، ہمت اور جینے کی امنگ دیتی رہے گی۔
