اسلام آباد (نمائندہ خصوصی) – الیکشن کمیشن آف پاکستان نے صاحبزادہ حسن رضا کو سنی اتحاد کونسل کا قائم مقام چیئرمین مقرر کر دیا ہے۔ یہ تقرری سنی اتحاد کونسل کے آئین اور ضوابط کے مطابق عمل میں لائی گئی ہے۔
یہ پیش رفت سنی اتحاد کونسل کے سابق چیئرمین صاحبزادہ حامد رضا کی نااہلی کے بعد سامنے آئی ہے۔ الیکشن کمیشن نے اس ضمن میں باضابطہ نوٹیفکیشن جاری کر دیا ہے، جس کے تحت صاحبزادہ حسن رضا انٹرا پارٹی ضمنی الیکشن تک اپنی ذمہ داریاں بطور قائم مقام چیئرمین ادا کریں گے۔
الیکشن کمیشن کے مطابق، یہ فیصلہ آئینی طریقہ کار کے تحت اور جماعت کے داخلی نظام کو مؤثر رکھنے کے لیے کیا گیا ہے۔
واضح رہے کہ صاحبزادہ حامد رضا کو 9 مئی کیس میں انسداد دہشتگردی عدالت فیصل آباد کی جانب سے سزا سنائے جانے کے بعد الیکشن کمیشن نے ان کی نااہلی کا نوٹیفکیشن جاری کیا تھا، جس کے بعد یہ عہدہ خالی ہو گیا تھا۔
سیاسی تجزیہ کاروں کے مطابق، سنی اتحاد کونسل کے لیے یہ ایک اہم مرحلہ ہے، اور قائم مقام چیئرمین کی تقرری جماعتی استحکام کے لیے اہمیت کی حامل سمجھی جا رہی ہے۔
