مقبوضہ کشمیر: 50 سالہ ریکارڈ ٹوٹتے ہوئے مقبوضہ کشمیر میں شدید بارشوں نے زبردست تباہی مچادی ہے۔ گزشتہ چند دنوں میں 360 ملی میٹر بارش کے باعث دریاؤں کے بند ٹوٹ گئے اور متعدد پل و سڑکیں بہہ گئیں، جس سے رابطے کا نظام مکمل طور پر متاثر ہوا ہے۔
وادی میں موبائل انٹرنیٹ، براڈبینڈ، اور ٹیلی فون سروس مکمل طور پر معطل ہو چکی ہے، جس سے امدادی کارروائیاں بھی متاثر ہو رہی ہیں۔ بارشوں اور لینڈ سلائیڈنگ کے نتیجے میں اب تک 30 افراد جاں بحق ہو چکے ہیں جبکہ جموں اور ڈوڈا میں ہلاکتوں کی تعداد 37 تک پہنچ گئی ہے۔
دریائے جہلم میں پانی کی سطح خطرناک حد سے تجاوز کر چکی ہے، جس کے پیش نظر حکام نے مزید بارشوں کی پیش گوئی کرتے ہوئے تمام تعلیمی ادارے آج بھی بند رکھنے کا اعلان کیا ہے۔
بھارت کے شمالی علاقوں ہماچل پردیش اور پنجاب بھی شدید بارشوں سے متاثر ہیں، جہاں منالی اور پٹھان کوٹ کے دریاؤں میں طغیانی کے باعث کئی عمارتیں منہدم ہو گئیں اور گاڑیاں بہہ گئیں۔
