کابل: افغانستان کے دارالحکومت کابل کے نواحی علاقے ارغندی میں ایک مسافر بس کے الٹنے سے 25 افراد جاں بحق اور 27 زخمی ہو گئے۔ حادثے کی وجہ ڈرائیور کی لاپرواہی بتائی جا رہی ہے۔
افغان وزارتِ داخلہ کے ترجمان عبدالمتین قانی کے مطابق افسوسناک واقعہ اس شاہراہ پر پیش آیا جو جنوبی قندہار کو کابل سے ملاتی ہے۔ حادثے کے فوراً بعد پولیس اور ایمرجنسی سروسز موقع پر پہنچ گئیں اور زخمیوں کو قریبی طبی مراکز منتقل کر دیا گیا، جہاں انہیں فوری طبی امداد فراہم کی جا رہی ہے۔
حکام کا کہنا ہے کہ متعدد زخمیوں کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔
واضح رہے کہ یہ افسوسناک واقعہ ایسے وقت میں پیش آیا ہے جب چند روز قبل ہی افغانستان کے مغربی صوبے ہرات میں ایران سے واپس آنے والے مہاجرین کی بس کے ایک المناک حادثے میں 78 افراد جان کی بازی ہار گئے تھے، جن میں بچے بھی شامل تھے۔
افغانستان میں ٹریفک حادثات کی بڑی وجوہات میں خراب سڑکیں، تیز رفتاری، اور ڈرائیوروں کی غفلت شامل ہیں۔ حکام کی جانب سے شہریوں سے محتاط ڈرائیونگ کی اپیل کی گئی ہے تاکہ مزید قیمتی جانوں کو محفوظ بنایا جا سکے۔
