لاہور: وزیراعلیٰ پنجاب مریم نواز شریف کی ہدایت پر صوبے میں ٹرانسپورٹ کے شعبے میں جدید، سستی اور ماحول دوست انقلابی قدم اٹھا لیا گیا۔ شنگھائی سی پورٹ سے مزید 100 جدید الیکٹرک بسیں پاکستان کے لیے روانہ ہو چکی ہیں، جو آئندہ چند ہفتوں میں پنجاب پہنچ جائیں گی۔
وزیراعلیٰ نے عوام کو خصوصی پیغام میں خوشخبری سناتے ہوئے اعلان کیا ہے کہ دسمبر 2025 تک پنجاب کے ہر ضلع میں یہ الیکٹرک بسیں سڑکوں پر رواں دواں ہوں گی۔ انہوں نے بتایا کہ ان بسوں کا کرایہ صرف 20 روپے مقرر کیا گیا ہے تاکہ ہر طبقہ کم خرچ میں آرام دہ اور معیاری سفر کا فائدہ اٹھا سکے۔
جدید سہولیات سے آراستہ الیکٹرک بسیں
وزیراعلیٰ کے مطابق یہ الیکٹرک بسیں درج ذیل جدید سہولیات سے لیس ہیں:
ایئرکنڈیشنڈ نظام
درجہ حرارت کنٹرول سسٹم
سی سی ٹی وی مانیٹرنگ (خصوصاً خواتین کی حفاظت کے لیے)
ماحول دوست ٹیکنالوجی جو آلودگی کم کرنے میں مددگار ہے
ماحولیاتی آلودگی کے خلاف مؤثر اقدام
مریم نواز شریف نے کہا کہ یہ منصوبہ صرف ٹرانسپورٹ کا نہیں بلکہ عوام کی فلاح، ماحولیاتی تحفظ اور سماجی بہتری کا جامع وژن ہے۔ انہوں نے کہا:
"یہ صرف بسیں نہیں، بلکہ امید کی نئی منزل ہے۔ بہت جلد پنجاب کے ہر شہر اور ہر ضلع میں عوام اپنی سڑکوں پر اس تبدیلی کو اپنی آنکھوں سے دیکھیں گے۔”
