وسیم اکرم کی دھمکی: ایشیا کپ میں پاکستان اور بھارت کے میچ کی فضا ہو سکتی ہے گرم، نظم و ضبط کی اپیل

سابق فاسٹ بولر اور کپتان وسیم اکرم نے خبردار کیا ہے کہ ایشیا کپ میں روایتی حریفوں پاکستان اور بھارت کے درمیان دبئی میں ہونے والا میچ فضا کو خاصا گرم کر سکتا ہے۔ موجودہ کشیدگی کے پیش نظر وسیم اکرم نے کھلاڑیوں اور شائقین دونوں سے اپیل کی ہے کہ وہ نظم و ضبط کا دامن تھامے رکھیں اور حد سے تجاوز نہ کریں۔

وسیم اکرم کا کہنا ہے کہ دنیا بھر کے کروڑوں شائقین بھارت اور پاکستان کے مقابلے دیکھتے ہیں، جو ہمیشہ دلچسپ اور جوش و جذبے سے بھرپور ہوتے ہیں، مگر ضروری ہے کہ کھیل کے دائرے میں رہ کر ہی حمایت کی جائے۔ انہوں نے کہا کہ حب الوطنی کا مطلب کھیل کو سیاست یا نفرت کی نذر کرنا نہیں ہے۔

سابق کپتان نے 14 ستمبر کو دبئی میں شیڈول اس میچ میں بھارت کو فیورٹ قرار دیا اور کہا کہ پاکستان نے گزشتہ برسوں میں بھارت کے خلاف مستقل کامیابی نہیں حاصل کی، تاہم ٹی ٹوئنٹی فارمیٹ میں گرین شرٹس کے پاس اب بھی کامیابی کے مواقع موجود ہیں۔ پاکستان نے 2021 کے ورلڈ کپ اور 2022 کے ایشیا کپ میں بھارت کو شکست دی تھی۔

وسیم اکرم نے مزید کہا کہ بھارت حالیہ عرصے میں بہتر فارم میں ہے اور میچ میں فیورٹ کے طور پر اترے گا، لیکن اصل فیصلہ اس وقت ہوگا جب یہ دیکھا جائے گا کہ کون سی ٹیم دباؤ کو بہتر طریقے سے سنبھالتی ہے۔