حکومت پاکستان نے ملک میں مقیم تمام افغان شہریوں کے انخلا کے لیے 1 ستمبر 2025 کی حتمی تاریخ مقرر کر دی ہے۔ اس فیصلے کے تحت وہ افغان باشندے بھی وطن واپسی کے پابند ہوں گے جن کے پاس پی او آر (پروف آف رجسٹریشن) یا افغان سٹیزن کارڈ موجود ہیں۔ انخلا کی اس مہم کے لیے اب صرف7دن باقی رہ گئے ہیں۔
سرکاری حکام کے مطابق یہ اقدام ملک میں غیر قانونی تارکین وطن کی بڑھتی ہوئی تعداد پر قابو پانے اور قانونی طور پر مقیم افراد کی مؤثر رجسٹریشن کو یقینی بنانے کے لیے اٹھایا گیا ہے۔
حکام نے واضح کیا ہے کہ پاکستان میں غیر قانونی طور پر مقیم تمام افغان شہریوں، حتیٰ کہ عارضی دستاویزات رکھنے والوں کو بھی، رضاکارانہ بنیادوں پر ملک چھوڑنا ہوگا۔ حکومت کی جانب سے یقین دہانی کرائی گئی ہے کہ انخلا کے عمل میں زبردستی یا کسی بھی قسم کی بدسلوکی نہیں برتی جائے گی۔
واپسی کے عمل کو باعزت، محفوظ اور منظم بنانے کے لیے حکومت نے افغان باشندوں کے لیے خوراک، طبی امداد اور دیگر بنیادی سہولیات کا بندوبست بھی مکمل کر لیا ہے۔
حکام نے افغان شہریوں سے اپیل کی ہے کہ وہ مقررہ مدت کے اندر اپنے واپسی کے انتظامات مکمل کر لیں تاکہ کسی بھی ممکنہ ناخوشگوار صورتحال سے بچا جا سکے۔
یہ فیصلہ ایسے وقت میں سامنے آیا ہے جب ملک میں غیر قانونی مہاجرین کی موجودگی کے باعث سکیورٹی، وسائل اور سماجی نظام پر شدید دباؤ کا سامنا ہے۔ حکام کا کہنا ہے کہ اس اقدام سے نہ صرف ملکی سلامتی کو بہتر بنانے میں مدد ملے گی بلکہ رجسٹریشن اور نگرانی کا نظام بھی مؤثر بنایا جا سکے گا۔
