اسلام آباد: محکمہ موسمیات نے ملک کے مختلف حصوں میں تیز ہواؤں، گرج چمک اور موسلادھار بارش کی پیشگوئی کر دی ہے۔ رپورٹ کے مطابق آج اور آئندہ چند روز کے دوران پاکستان کے بالائی اور مشرقی علاقوں میں موسم غیر مستحکم رہنے کا امکان ہے۔
ترجمان محکمہ موسمیات کے مطابق اسلام آباد اور گرد و نواح میں گرج چمک کے ساتھ بارش متوقع ہے، جبکہ شمال مشرقی پنجاب میں بعض مقامات پر موسلادھار بارش بھی ہو سکتی ہے، جس سے نشیبی علاقوں میں پانی جمع ہونے اور معمولات زندگی متاثر ہونے کا خدشہ ہے۔
بارش کی زد میں آنے والے علاقے:
پنجاب میں راولپنڈی، مری، گلیات، لاہور، گوجرانوالہ، گجرات، سیالکوٹ، شیخوپورہ، فیصل آباد، جھنگ، قصور، نارووال، منڈی بہاؤالدین، حافظ آباد، وزیرآباد، اوکاڑہ، ساہیوال، بہاولنگر، چکوال، جہلم، چینوٹ اور ڈیرہ غازی خان میں بارش کا امکان ظاہر کیا گیا ہے۔
خیبرپختونخوا کے بالائی علاقوں بشمول سوات، کوہستان، شانگلہ، بٹگرام، مانسہرہ، بونیر، کوہاٹ، کرم، اورکزئی، خیبر اور ہنگو میں بھی گرج چمک کے ساتھ بارش کی پیشگوئی کی گئی ہے۔
بلوچستان کے علاقے بارکھان، ژوب، موسیٰ خیل، لورالائی، کوہلو، سبی، ڈیرہ بگٹی، قلات، خضدار اور لسبیلہ میں بارش متوقع ہے۔
سندھ میں کراچی، حیدرآباد، تھرپارکر، دادو، سانگھڑ، میرپورخاص، بدین، عمرکوٹ، مٹھی اور ٹھٹھہ میں شام یا رات کے وقت بارش کا امکان ہے۔
آزاد کشمیر اور گلگت بلتستان کے مختلف حصوں میں بھی تیز ہواؤں کے ساتھ گرج چمک اور بارش کی توقع ہے۔
رات کے وقت شدید بارش کی وارننگ
محکمہ موسمیات نے خبردار کیا ہے کہ بالائی خیبرپختونخوا، شمال مشرقی پنجاب اور کشمیر میں رات کے وقت موسلا دھار بارش ہو سکتی ہے، جو مقامی ندی نالوں میں طغیانی کا باعث بن سکتی ہے۔ شہریوں کو ہدایت کی گئی ہے کہ وہ احتیاطی تدابیر اختیار کریں اور مقامی انتظامیہ سے رابطے میں رہیں۔
