اسلام آباد (نمائندہ خصوصی) — وزیراعظم شہباز شریف نے گلگت بلتستان میں گلیشیئر پھٹنے کی پیشگی اطلاع دے کر 300 سے زائد انسانی جانیں بچانے والے مقامی ہیروز کو اسلام آباد مدعو کر لیا ہے۔ یہ قومی ہیروز — وصیت خان، انصار اور محمد خان — مشکل وقت میں فرض شناسی اور دلیری کی روشن مثال بن کر سامنے آئے۔
وزیراعظم شہباز شریف نے کہا:
"وصیت خان، انصار اور محمد خان صرف گلگت بلتستان نہیں، پوری قوم کے ہیرو ہیں۔ ان کی فرض شناسی اور انسانی جانیں بچانے کی بے مثال قربانی پر پوری قوم کو فخر ہے۔”
وزیراعظم نے تینوں نوجوانوں کو خصوصی انعامات سے نوازنے کا اعلان بھی کیا ہے۔
قیامت خیز لمحے کا احوال — وصیت خان کی زبانی
سماء ٹی وی سے گفتگو کرتے ہوئے غذر کے علاقے راوشن سے تعلق رکھنے والے وصیت خان نے واقعے کی تفصیل بتاتے ہوئے کہا:
"جب جھیل پھٹی، تو ایسا لگا جیسے قیامت آ گئی ہو، پہاڑ ہمارے سروں پر آ گرا ہو۔ ہم نے بس ایک ہی بات سوچ رکھی تھی — گاؤں والوں کو بچانا ہے۔”
وصیت خان نے مزید بتایا کہ:
اللہ کا شکر ہے موبائل سگنل موجود تھا اور فوری نمبر مل گیا۔
اطلاع ملتے ہی مقامی انتظامیہ نے آدھے گھنٹے کے اندر گاؤں کے لوگوں کو محفوظ مقام پر منتقل کر دیا۔
جس جگہ ہم موجود تھے، وہ مکمل سیلابی پانی میں بہہ گئی تھی۔
خود کو بھی خطرے میں محسوس کر رہے تھے لیکن گاؤں بچانا اولین ترجیح تھی۔
انہوں نے بتایا کہ پہلا ہیلی کاپٹر انہیں نہ نکال سکا جس پر کچھ دیر کے لیے مایوسی ہوئی، لیکن دوسرا ہیلی کاپٹر آ کر انہیں اور ساتھیوں کو بچا لے گیا۔
فرض شناسی اور بہادری کی مثال
گلگت بلتستان کے ان نوجوانوں کی فوری اطلاع، حاضر دماغی اور بہادری نے ایک بڑے انسانی المیے کو روکا۔ ان کی خدمات کا اعتراف کرتے ہوئے نہ صرف وزیراعظم بلکہ پوری قوم ان کے لیے تحسین اور دعاؤں کا اظہار کر رہی ہے
