رائیونڈ — وفاقی وزیر داخلہ محسن نقوی نے تبلیغی مرکز رائیونڈ کا خصوصی دورہ کیا، جہاں انہوں نے تبلیغی جماعت کے اکابرین مولانا محمد احمد بٹلر، مولانا عبید اللہ خورشید، ڈاکٹر سلیم اور دیگر شخصیات سے ملاقات کی۔
ملاقات میں نومبر میں منعقد ہونے والے عالمی تبلیغی اجتماع کے انتظامات زیرِ بحث آئے۔ تبلیغی جماعت کے رہنماؤں نے وفاقی وزیر داخلہ کو بیرونِ ملک سے آنے والے وفود، ویزوں اور دیگر انتظامی امور پر تفصیلات سے آگاہ کیا۔
محسن نقوی نے تبلیغی جماعت کی دین اسلام کیلئے خدمات کو سراہتے ہوئے یقین دہانی کروائی کہ اجتماع میں شریک غیر ملکی مہمانوں کو ہر ممکن سہولت فراہم کی جائے گی۔ انہوں نے کہا:
"یہ مہمان ہمارے لیے معزز ہیں۔ ویزا سے متعلق جہاں بھی مسئلہ ہوا، اسے ترجیحی بنیادوں پر حل کیا جائے گا۔ ہر سطح پر آسانیاں پیدا کریں گے۔”
وفاقی وزیر داخلہ نے یہ بھی کہا کہ وہ ہر سال تبلیغی اجتماع میں باقاعدگی سے شرکت کرتے ہیں اور ان شاء اللہ اس سال بھی شریک ہوں گے۔
اس موقع پر دعا کرتے ہوئے انہوں نے کہا کہ اللہ تعالیٰ تبلیغی جماعت کو دین کی خدمت میں استقامت عطا فرمائے اور اجتماع کے کامیاب انعقاد کی توفیق دے۔
"دین اسلام اور انسانیت کی خدمت ہمارا شعار ہونا چاہیے” — مولانا محمد احمد بٹلر
مولانا محمد احمد بٹلر نے گفتگو کرتے ہوئے کہا:
"ہم سب نے ایک دن اللہ تعالیٰ کی طرف لوٹ جانا ہے۔ ہمیں دین اسلام اور انسانیت کی خدمت کو اپنی زندگی کا مشن بنانا چاہیے۔ اللہ کے بتائے ہوئے راستے پر چلنے میں ہی بھلائی اور کامیابی ہے۔”
