پشاور: خیبرپختونخوا میں 22 سے 26 اگست کے دوران شدید مون سون بارشوں اور آندھی کی پیشگوئی کے پیش نظر پروونشل ڈیزاسٹر مینجمنٹ اتھارٹی (پی ڈی ایم اے) نے صوبے بھر میں ہائی الرٹ جاری کر دیا ہے۔
پی ڈی ایم اے کے مطابق ایبٹ آباد، مانسہرہ، سوات، چترال، دیر، مالاکنڈ، کوہستان، بونیر، پشاور، مردان، نوشہرہ، ڈیرہ اسماعیل خان اور وزیرستان سمیت متعدد اضلاع میں موسلادھار بارشوں کے نتیجے میں سیلاب، طغیانی، لینڈ سلائیڈنگ اور اربن فلڈنگ کا خطرہ موجود ہے۔
ادارے نے خبردار کیا ہے کہ شدید بارشوں سے مقامی ندی نالے، دریا اور پہاڑی سلسلوں میں طغیانی جبکہ شہری علاقوں میں نکاسی آب کے مسائل پیدا ہو سکتے ہیں۔ آندھی اور گرج چمک کے باعث کمزور مکانات، بجلی کے کھمبے، سائن بورڈز اور سولر پینلز کو بھی نقصان پہنچنے کا خدشہ ہے۔
احتیاطی اقدامات کی ہدایات
پی ڈی ایم اے نے تمام ضلعی انتظامیہ اور متعلقہ اداروں کو ہدایت کی ہے کہ:
نکاسی آب کے نظام کی فوری صفائی کی جائے
ممکنہ متاثرہ علاقوں میں عوام کو بروقت آگاہ کیا جائے
سیاحوں اور مسافروں کو خطرناک مقامات پر جانے سے روکا جائے
کاشتکار اور مویشی پالنے والے افراد فصلوں اور جانوروں کو محفوظ مقامات پر منتقل کریں
ایمرجنسی سروسز، طبی امداد، خوراک و دیگر ضروری اشیاء کی فراہمی یقینی بنائی جائے
عوام سے اپیل
پی ڈی ایم اے نے عوام سے اپیل کی ہے کہ خراب موسم کے دوران غیر ضروری سفر سے اجتناب کریں اور کسی بھی ہنگامی صورتحال میں پی ڈی ایم اے کی ہیلپ لائن 1700 پر رابطہ کریں۔ ایمرجنسی آپریشن سینٹر 24 گھنٹے فعال رہے گا۔
