لاہور: صوبائی وزیر تعلیم رانا سکندر حیات نے نہم جماعت کے حالیہ امتحانات میں ناقص کارکردگی دکھانے والے سرکاری اسکولوں اور اساتذہ کے خلاف سخت اقدامات کا اعلان کر دیا۔ خراب نتائج دینے والے اساتذہ کی فہرستیں تیار کی جا رہی ہیں، جنہیں ممکنہ طور پر نوکری سے فارغ بھی کیا جا سکتا ہے۔
محکمہ اسکول ایجوکیشن کی ٹیم پہلی بار ایسی فہرستیں مرتب کرے گی، جس میں ان اسکولوں اور اساتذہ کی نشاندہی کی جائے گی جن کے طلبا نے امتحانات میں خراب کارکردگی کا مظاہرہ کیا۔
"اربوں روپے خرچ ہو رہے ہیں، زیرو رزلٹ اب برداشت نہیں” – وزیر تعلیم
وزیر تعلیم رانا سکندر حیات نے خبردار کیا ہے کہ ناقص تعلیمی نتائج کسی صورت قابل قبول نہیں۔ انہوں نے کہا:
"اربوں روپے تعلیم پر خرچ کیے جا رہے ہیں، اس کے باوجود اگر نتائج صفر ہوں تو یہ ناقابلِ برداشت ہے۔”
انہوں نے مزید کہا کہ اب احتساب کا عمل ضلعی اور تحصیل سطح پر اسکولوں سے شروع کیا جائے گا تاکہ تعلیمی معیار کو بہتر بنایا جا سکے۔
اچھے اساتذہ کی حوصلہ افزائی بھی ہوگی
وزیر تعلیم نے واضح کیا کہ جہاں ناقص کارکردگی پر سزا ہوگی، وہیں اچھے نتائج دینے والے اساتذہ کو انعامات سے نوازا جائے گا۔ ان کے مطابق، ایسے اساتذہ کی بھی فہرست تیار کی جا رہی ہے تاکہ ان کی محنت اور کارکردگی کو سراہا جا سکے۔
تعلیمی نظام میں بہتری کی کوششیں تیز
ذرائع کے مطابق محکمہ تعلیم کا یہ اقدام تعلیمی نظام میں بہتری لانے، اساتذہ کو ذمہ داری کا احساس دلانے اور طلبا کی کارکردگی بہتر بنانے کے لیے اٹھایا گیا ہے۔ آئندہ ہفتوں میں فہرستوں کی تیاری مکمل ہونے کے بعد کارروائی کا آغاز متوقع ہے۔
