محمد صلاح تیسری بار سال کے بہترین پروفیشنل فٹبالر قرار
قاہرہ/لیورپول: مصر اور لیورپول کے عالمی شہرت یافتہ فٹبالر محمد صلاح نے ایک بار پھر اپنی صلاحیتوں کا لوہا منواتے ہوئے تیسری مرتبہ سال کے بہترین پروفیشنل فٹبالر کا اعزاز اپنے نام کر لیا۔
پروفیشنل فٹبالرز ایسوسی ایشن (PFA) کی جانب سے 33 سالہ محمد صلاح کو سال 2025 کا بہترین فٹبالر قرار دیا گیا۔ اس سے قبل وہ یہ اعزاز 2018 اور 2022 میں بھی جیت چکے ہیں۔
محمد صلاح نے پریمیئر لیگ کے گزشتہ سیزن میں شاندار کارکردگی کا مظاہرہ کرتے ہوئے 29 گول اسکور کیے اور 18 گول اسسٹ فراہم کیے، جس کی بدولت لیورپول کو لیگ ٹائٹل جیتنے میں کلیدی کامیابی حاصل ہوئی۔ ان کی غیر معمولی کارکردگی نے انہیں نہ صرف پریمیئر لیگ پلیئر آف دی سیزن کا اعزاز دلوایا بلکہ وہ گولڈن بوٹ (سب سے زیادہ گول کرنے والے کھلاڑی) اور پلے میکر ایوارڈ (سب سے زیادہ اسسٹ دینے والے کھلاڑی) بھی حاصل کرنے میں کامیاب رہے۔
محمد صلاح اب وہ پہلے کھلاڑی بن چکے ہیں جنہوں نے ایک ہی سیزن میں یہ تینوں بڑے انفرادی ایوارڈز جیتے ہوں — ایک غیر معمولی سنگ میل جس نے انہیں جدید فٹبال کی تاریخ کا ایک ناقابلِ فراموش نام بنا دیا ہے۔
صلاح کا فٹبال کیریئر 2017 میں لیورپول میں شمولیت کے بعد بلندیوں کو چھونے لگا، اور آج وہ صرف عرب دنیا ہی نہیں بلکہ دنیا بھر میں فٹبال کے نوجوان مداحوں کے لیے ایک روشن مثال بن چکے ہیں۔
