رجب بٹ اور ایمان کے ازدواجی مسائل میں "تیسری مداخلت” کو ذمہ دار قرار: ڈاکٹر عفّان قیص
اسلام آباد: معروف میڈیکل اینالسٹ اور سماجی شخصیت ڈاکٹر عفّان قیصر نے مشہور سوشل میڈیا جوڑی، رجب بٹ اور ایمان رجب، کے درمیان بڑھتی ہوئی کشیدگی پر اپنے خیالات کا اظہار کرتے ہوئے کہا ہے کہ ان کے ازدواجی مسائل کی اصل وجہ تیسرے فریق کی مداخلت ہے۔
سوشل میڈیا پر وائرل ہونے والے بیان میں ڈاکٹر عفّان نے کہا، "شوہر اور بیوی کے درمیان تعلق ایک نازک رشتہ ہوتا ہے جسے صرف وہی بہتر طریقے سے سمجھ اور سنوار سکتے ہیں۔ اگر خاندان یا باہر کے افراد بیچ میں آئیں گے تو بات مزید بگڑ سکتی ہے۔”
"لمبی ڈرائیو پر جائیں، بیٹھ کر بات کریں”
انہوں نے مشورہ دیا کہ، "رجب اور ایمان کو کسی پرسکون ماحول میں ایک دوسرے کے ساتھ وقت گزارنا چاہیے، چاہے وہ ایک کمرہ ہو یا کوئی لمبی ڈرائیو۔ ایک دوسرے کو سنیں، سمجھیں اور دل کی بات کریں۔ یہی اس مسئلے کا بہترین حل ہے۔”
رشتہ داروں کی مداخلت پر تنقید
ڈاکٹر عفّان قیصر نے خاص طور پر ایمان کے بھائی اعوان اور رجب بٹ کی والدہ کا ذکر کرتے ہوئے کہا کہ دونوں کو اس معاملے سے دور رہنا چاہیے۔ ان کا کہنا تھا کہ، "یہ رجب اور ایمان کے بیچ کا معاملہ ہے۔ کسی اور کو فیصلے کرنے یا ترجمانی کا اختیار نہیں۔”
انہوں نے واضح کیا کہ اکثر ازدواجی مسائل اسی وقت شدت اختیار کرتے ہیں جب خاندان کے افراد فریق بن جاتے ہیں۔ "تعلق ختم ہونے کے دہانے پر پہنچنے سے پہلے، مسئلے کو نجی طور پر حل کرنا ہی دانشمندی ہے، خاص طور پر جب دونوں افراد عوامی شخصیات ہوں۔”
ڈاکٹر عفّان کے یہ خیالات تیزی سے سوشل میڈیا پر وائرل ہو رہے ہیں، جہاں بیشتر صارفین ان کی باتوں سے اتفاق کرتے دکھائی دے رہے ہیں۔ سوشل میڈیا صارفین کا کہنا ہے کہ نجی زندگی کے مسائل کو پبلک کرنے سے نہ صرف مزید دباؤ پیدا ہوتا ہے بلکہ مسائل کا حل بھی پیچیدہ ہو جاتا ہے۔
