امریکہ میں پابندی کے خدشات کے باوجود وائٹ ہاؤس نے ٹک ٹاک پر اپنا آفیشل اکاؤنٹ بنا لیا
واشنگٹن: امریکہ میں ٹک ٹاک پر پابندی کے خدشات اور متنازعہ قانون کے باوجود وائٹ ہاؤس نے باضابطہ طور پر اس مقبول سوشل میڈیا پلیٹ فارم پر اپنا آفیشل اکاؤنٹ قائم کر لیا ہے۔ یہ اقدام اس وقت سامنے آیا ہے جب ٹک ٹاک کی مالک کمپنی بائٹ ڈانس کو امریکی خریدار کو ایپ فروخت کرنے یا ملک میں پابندی کے خطرات کا سامنا ہے۔
امریکی صدر ڈونلڈ ٹرمپ نے ٹک ٹاک پر پابندی کے حوالے سے قانون کی ڈیڈ لائن کئی بار موخر کی ہے، اور اب نئی آخری تاریخ 17 ستمبر مقرر کی گئی ہے۔ جون میں دی گئی توسیع نے ٹک ٹاک کو تقریباً 17 کروڑ امریکی صارفین کے لیے دستیاب رکھا، تاہم گزشتہ سال منظور شدہ قانون میں چینی ملکیت کو قومی سلامتی کے لیے خطرہ قرار دیا گیا تھا۔
وائٹ ہاؤس کے ٹک ٹاک اکاؤنٹ کی پہلی پوسٹ میں صدر ٹرمپ کی ایک ویڈیو شامل ہے، جس میں وہ اپنے عزم کا اظہار کرتے ہوئے کہتے ہیں، "میں آپ کی آواز ہوں، اور میں اس قوم کے لوگوں کے لیے بہتر زندگی فراہم کرنے کے لیے پرعزم ہوں۔”
یہ قدم ٹک ٹاک کے خلاف جاری تنازعات کے درمیان امریکی حکام کی جانب سے اس پلیٹ فارم کو عوامی رابطے کے لیے اہم ذریعہ تسلیم کرنے کی علامت سمجھا جا رہا ہے۔
