صنم ماروی اور احمد شاہ کے درمیان تنازع ختم – غلط فہمیاں دور، باہمی معافی پر معاملہ طے

کراچی: معروف گلوکارہ صنم ماروی اور آرٹس کونسل آف پاکستان کراچی کے صدر احمد شاہ کے درمیان پیدا ہونے والا تنازع خوش اسلوبی سے ختم ہو گیا۔ دونوں نے باہمی غلط فہمیاں دور کرتے ہوئے ایک دوسرے کو معاف کر دیا، جسے فنکار برادری اور ثقافتی حلقوں میں خوش آئند پیشرفت قرار دیا جا رہا ہے۔

یاد رہے کہ چند روز قبل صنم ماروی نے احمد شاہ کو 5 کروڑ روپے ہرجانے کا قانونی نوٹس بھجوایا تھا۔ نوٹس میں الزام عائد کیا گیا تھا کہ 10 اگست کو سکھر میں سندھ حکومت کے ایک ثقافتی پروگرام کے دوران انہیں دھکے دیے گئے، نامناسب زبان استعمال کی گئی اور دھمکیاں دی گئیں۔ گلوکارہ نے ایک ہفتے کے اندر معافی نہ مانگنے کی صورت میں قانونی کارروائی کا اعلان بھی کیا تھا۔

احمد شاہ نے الزامات کو مسترد کرتے ہوئے کہا تھا کہ انہوں نے کسی قسم کی توہین یا دھمکی نہیں دی۔ تاہم اب سندھ کے وزیر ثقافت سید ذوالفقار علی شاہ اور نامور ادیبہ نور الہدیٰ شاہ کی مداخلت سے دونوں کے درمیان صلح کروا دی گئی۔

وزیر ثقافت نے اپنے سوشل میڈیا پیج پر ایک ویڈیو شیئر کی، جس میں احمد شاہ نے صنم ماروی کو "چھوٹی بہن اور بیٹی” قرار دیتے ہوئے کہا کہ ان کے درمیان برسوں پرانے خوشگوار تعلقات ہیں اور حالیہ تنازع صرف غلط فہمی کا نتیجہ تھا۔ انہوں نے یہ بھی تسلیم کیا کہ ان کے اسٹاف کے نامناسب رویے سے صنم ماروی کو تکلیف پہنچی، جس پر وہ افسوس کا اظہار کرتے ہیں۔