اسلام آباد: پاکستان میں مقیم رجسٹرڈ افغان شہریوں (پی او آر کارڈ ہولڈرز) کی وطن واپسی کے لیے حکومت کی جانب سے دی گئی آخری تاریخ 31 اگست 2025 مقرر کی گئی ہے، جس کے بعد ان کی رجسٹریشن ختم کر دی جائے گی۔
وزارت سیفران (SAFRON) نے تمام متعلقہ صوبائی و ضلعی کمیٹیوں کو افغان مہاجرین سے متعلق مکمل ڈیٹا فراہم کر دیا ہے، جبکہ سرحدی ٹرمینلز پر رجسٹریشن بند کرنے کے انتظامات بھی مکمل کر لیے گئے ہیں۔ وطن واپسی کے عمل کو مؤثر بنانے کے لیے بایو میٹرک تصدیق لازمی قرار دی گئی ہے۔
رپورٹس کے مطابق وزارت داخلہ نے افغان شہریوں کی واپسی کا ایکشن پلان صوبوں کو ارسال کر دیا ہے۔ تمام صوبائی حکومتیں اور حساس ادارے پی او آر کارڈ ہولڈرز کی میپنگ مکمل کر چکے ہیں، جبکہ ضلعی و صوبائی سطح پر کمیٹیاں تشکیل دے کر انہیں مرکزی کنٹرول روم سے منسلک کیا گیا ہے تاکہ نگرانی کا عمل شفاف طریقے سے انجام پائے۔
واپسی کے لیے مختلف ٹرانزٹ ایریاز کا تعین کر لیا گیا ہے، اور ان افراد کی نقل و حرکت کے لیے الگ سے لازمی سفری منصوبہ بھی تیار کیا گیا ہے۔
31 اگست کے بعد نادرا ان افغان شہریوں کی رجسٹریشن کو مستقل طور پر ختم کر دے گا، جبکہ ایف آئی اے مخصوص بارڈر کراسنگ پوائنٹس پر ان کی واپسی کی سہولت فراہم کرے گا۔ اس سارے عمل کی نگرانی فارن نیشنل سیکیورٹی ڈیش بورڈ کرے گا تاکہ واپسی کا عمل منظم اور محفوظ طریقے سے مکمل کیا جا سکے۔
