سوات — وفاقی وزیر و صدر پاکستان مسلم لیگ ن خیبرپختونخوا انجینئر امیر مقام نے سوات میں حالیہ سیلاب کے دوران اپنی جانوں کی پرواہ نہ کرتے ہوئے بے شمار قیمتی جانیں بچانے والے دو بہادر رضاکاروں محمد ہلال اور عصمت علی کو وزیرِاعظم محمد شہباز شریف کی جانب سے 10 لاکھ روپے کے دو دو چیک پیش کیے۔
امیر مقام نے کہا کہ محمد ہلال اور عصمت علی کی ہمت اور قربانی انسانیت اور حب الوطنی کی روشن مثال ہے۔ انہوں نے کہا کہ ایسے نوجوانوں کی بہادری ہمارے لیے فخر کا باعث ہے اور یہ ثابت کرتی ہے کہ قومی طاقت اتحاد اور ہمدردی میں پوشیدہ ہے۔
انہوں نے یقین دلایا کہ حکومت بحران کے وقت قوم کی خدمت کرنے والوں کی حوصلہ افزائی اور مدد کے لیے ہر ممکن کوشش کرے گی۔ امیر مقام نے تمام رضاکاروں اور امدادی کارکنوں کا بھی شکریہ ادا کیا جنہوں نے سیلاب زدہ علاقوں میں امدادی کارروائیوں میں نمایاں کردار ادا کیا۔
محمد ہلال اور عصمت علی نے وزیرِ اعظم اور وفاقی وزیر کا شکریہ ادا کرتے ہوئے کہا کہ وہ آئندہ بھی ہر ممکن موقع پر قوم کی خدمت جاری رکھیں گے۔
