عامر خان کے بھائی فیصل خان کے الزامات پر اہل خانہ کا سخت ردعمل، دعویٰ مسترد

ممبئی (نیوز ڈیسک) — بھارتی فلم انڈسٹری کے معروف اداکار عامر خان کے بھائی فیصل خان کی جانب سے حالیہ دنوں میں لگائے گئے سنگین الزامات پر عامر خان کے اہل خانہ نے سخت ردعمل ظاہر کیا ہے۔

چند روز قبل ایک انٹرویو میں فیصل خان نے انکشاف کیا تھا کہ عامر خان نے انہیں ایک سال تک گھر میں قید رکھا اور اہل خانہ نے انہیں دماغی بیماری (شیزوفرینیا) کا مریض قرار دے کر معاشرتی خطرہ سمجھا۔ فیصل کا کہنا تھا کہ اس دوران انہیں گھر سے باہر جانے کی اجازت نہیں تھی، فون ضبط کر لیا گیا اور ان کے کمرے کے باہر گارڈز تعینات تھے جو انہیں دوائیں دیتے تھے۔

تاہم، عامر خان کے اہل خانہ نے ان الزامات کی سختی سے تردید کرتے ہوئے کہا ہے کہ فیصل کی جانب سے والدہ، بہن اور بھائی پر لگائے گئے الزامات افسوسناک ہیں اور یہ پہلا موقع نہیں جب انہوں نے حقائق کو غلط انداز میں پیش کیا ہے۔

اہل خانہ کے بیان میں کہا گیا کہ فیصل سے متعلق تمام فیصلے خاندان کے مشترکہ مشورے اور ماہرِ نفسیات کی رہنمائی میں کیے گئے، اور یہ سب کچھ ان کی جذباتی و نفسیاتی بہتری کے لیے کیا گیا تھا۔ اسی وجہ سے خاندان نے اس حساس معاملے کی تفصیلات عوامی سطح پر لانے سے احتیاط برتی۔

عامر خان کے اہل خانہ نے میڈیا اور عوام سے درخواست کی ہے کہ اس نجی معاملے کو سنسنی خیز انداز میں نہ پھیلایا جائے اور غیر ضروری قیاس آرائیوں سے گریز کیا جائے۔