واشنگٹن / اسلام آباد (نمائندہ خصوصی)
پاکستان کے 78ویں یومِ آزادی کے موقع پر امریکی وزیر خارجہ مارکو روبیو نے پاکستانی عوام کو مبارکباد دیتے ہوئے پاک-امریکا تعلقات کو مزید مستحکم بنانے کی خواہش کا اظہار کیا ہے۔
امریکی محکمہ خارجہ کی جانب سے جاری بیان میں مارکو روبیو نے کہا کہ:
"پاکستانی عوام یومِ آزادی منا رہے ہیں، انہیں دل کی گہرائیوں سے مبارکباد پیش کرتے ہیں۔”
انہوں نے کہا کہ امریکا انسداد دہشت گردی، تجارت اور خطے میں قیامِ امن کے لیے پاکستان کی کوششوں کو قدر کی نگاہ سے دیکھتا ہے۔
معاشی شراکت داری کا عزم
مارکو روبیو نے اپنے پیغام میں کہا کہ امریکا اور پاکستان کے درمیان اقتصادی تعاون کو فروغ دینے کی ضرورت ہے۔ انہوں نے واضح کیا کہ دونوں ممالک معدنیات، ہائیڈرو کاربن، اور کاروباری شراکت داری جیسے اہم شعبوں میں مل کر کام کریں گے تاکہ دونوں اقوام کے لیے خوشحال مستقبل کی راہ ہموار کی جا سکے۔
انہوں نے کہا:
"ہم اس شراکت کو مضبوط بنا کر دونوں اقوام کے عوام کے لیے ترقی کے مزید مواقع پیدا کرنا چاہتے ہیں۔”
دوطرفہ تعلقات کی اہمیت
امریکی وزیر خارجہ نے اس امید کا اظہار بھی کیا کہ پاکستان اور امریکا کے تعلقات آنے والے دنوں میں مزید گہرے اور مضبوط ہوں گے۔
واضح رہے کہ پاکستان میں آج 78واں جشنِ آزادی بھرپور جوش و خروش اور ملی جذبے سے منایا جا رہا ہے، اور عالمی برادری کی جانب سے پاکستان کو مبارکبادوں کا سلسلہ جاری ہے۔
