اسلام آباد (نمائندہ خصوصی)
وفاقی دارالحکومت میں 78ویں یومِ آزادی کی مرکزی تقریب جناح اسپورٹس اسٹیڈیم میں نہایت جوش و جذبے سے منعقد ہوئی، جسے "معرکۂ حق” کے نام سے موسوم کیا گیا۔ تقریب میں صدرِ مملکت آصف علی زرداری، وزیراعظم شہباز شریف، اور فیلڈ مارشل سید عاصم منیر بطور مہمانِ خصوصی شریک ہوئے۔
تقریب میں وفاقی وزرا، عسکری قیادت، غیر ملکی سفارتکاروں، ارکانِ پارلیمنٹ، اعلیٰ حکومتی شخصیات اور شہریوں کی بڑی تعداد نے شرکت کی۔ وزیر دفاع خواجہ آصف، وزیر داخلہ محسن نقوی، وزیر اطلاعات عطا اللہ تارڑ، وزیراعلیٰ پنجاب مریم نواز شریف، خاتون اول آصفہ بھٹو زرداری، اور سینئر وزیر مریم اورنگزیب بھی تقریب میں موجود تھیں۔
تقریب کا آغاز قومی پرچم کے باوقار استقبال سے ہوا۔ علم بردار دستے نے شاندار مارچ پاسٹ کیا، جبکہ تینوں مسلح افواج کے چاق و چوبند دستوں، پنجاب رینجرز اور ایف سی خیبرپختونخوا نے مارچ پاسٹ میں حصہ لے کر حاضرین کے دل جیت لیے۔ حاضرین نے کھڑے ہو کر قومی پرچم کو سلامی پیش کی، جس نے وطن سے محبت کا خوبصورت مظاہرہ پیش کیا۔
تقریب میں "معرکۂ حق” کے شہداء اور غازیوں کو زبردست خراجِ تحسین پیش کیا گیا، جن کی قربانیوں کے سبب آج پاکستان ایک آزاد اور خودمختار ریاست کے طور پر دنیا کے نقشے پر موجود ہے۔
ملک بھر میں یومِ آزادی کی تیاریاں مکمل، قومی جوش و جذبہ عروج پر
اسلام آباد، لاہور، پشاور سمیت ملک کے تمام چھوٹے بڑے شہروں، قصبوں اور دیہات میں جشنِ آزادی کی تیاریاں اپنے عروج پر پہنچ گئی ہیں۔ اہم سرکاری و نجی عمارات کو قومی پرچم، جھنڈیوں اور برقی قمقموں سے سجا دیا گیا ہے۔
شہریوں کی بڑی تعداد بازاروں میں موجود ہے جہاں قومی پرچم، بیجز، کھلونے، شرٹس اور سٹیکرز کی خریداری عروج پر ہے۔ جگہ جگہ لگے قومی سٹالز عوام کی توجہ کا مرکز بنے ہوئے ہیں۔
پنجاب حکومت نے اس سال یومِ آزادی کو منفرد انداز میں منانے کا اعلان کیا ہے۔ لاہور میں مینارِ پاکستان، حضوری باغ اور دیگر عوامی مقامات پر تقریبات کے انتظامات آخری مراحل میں داخل ہو چکے ہیں۔
ادبی و ثقافتی سرگرمیوں کا بھی آغاز
یومِ آزادی کے حوالے سے ملک بھر کی جامعات، کالجز اور اسکولوں میں خصوصی تقریبات، مشاعرے، خاکے، ڈرامے اور کھیلوں کے مقابلے منعقد کیے جا رہے ہیں۔ شعراء و ادبا بھی حب الوطنی کے جذبے سے سرشار ہو کر ادبی محفلوں کا حصہ بن رہے ہیں۔
یومِ آزادی: قومی وحدت اور قربانیوں کی علامت
شہریوں کا کہنا ہے کہ یومِ آزادی صرف ایک دن نہیں بلکہ قربانیوں، قومی وحدت اور پاکستان سے محبت کے عہد کی تجدید کا دن ہے۔ یہ دن ہمیں یاد دلاتا ہے کہ کس طرح ہمارے بزرگوں نے قربانیاں دے کر ہمیں آزاد وطن دیا۔
آج کا دن نہ صرف خوشی اور فخر کا موقع ہے بلکہ حب الوطنی، یکجہتی اور عزمِ نو کے اظہار کا مظہر بھی ہے۔ پوری قوم نے اس بار جشنِ آزادی کو غیر معمولی جوش و خروش سے منانے کا عزم کر رکھا ہے۔
