اسلام آباد: وفاقی وزیر داخلہ محسن نقوی نے کالعدم بلوچ لبریشن آرمی (بی ایل اے) اور مجید بریگیڈ کو دہشت گرد تنظیمیں قرار دینے کے امریکی فیصلے کا خیرمقدم کیا ہے، اور اسے پاکستان کے لیے ایک بڑی سفارتی کامیابی قرار دیا ہے۔
اپنے جاری کردہ بیان میں وزیر داخلہ نے امریکی صدر ڈونلڈ ٹرمپ اور ان کی انتظامیہ کا شکریہ ادا کرتے ہوئے کہا کہ "یہ فیصلہ پاکستان کی انتھک سفارتی کوششوں کا نتیجہ ہے اور ہمارے ازلی دشمن کے لیے ایک اور شکست ہے۔”
محسن نقوی کا کہنا تھا کہ یہ اقدام نہ صرف دہشت گردی کے خلاف پاکستان کی لازوال قربانیوں کا اعتراف ہے بلکہ اس سے پاک-امریکہ تعاون کو بھی تقویت ملے گی۔
انہوں نے کہا کہ دہشت گرد تنظیموں کے خلاف عالمی سطح پر کارروائی کی راہ ہموار ہو گئی ہے، اور دہشت گردی کے خلاف مشترکہ موقف اپنانا وقت کی اہم ضرورت بن چکا ہے۔ انہوں نے مزید کہا کہ امریکی اقدام خطے میں امن و استحکام کے فروغ کا سبب بنے گا۔
وزیر داخلہ نے امید ظاہر کی کہ پاکستان اور امریکہ دہشت گردی کے خلاف تعاون کو مزید وسعت دیں گے، تاکہ انتہا پسندی اور دہشت گردی جیسے چیلنجز کا مؤثر طور پر مقابلہ کیا جا سکے۔
