امریکی ریاست مونٹانا میں طیارہ ایئرپورٹ پر دیگر جہازوں سے جا ٹکرایا، آگ لگ گئی مگر جانی نقصان نہیں
مونٹانا، امریکہ (12 اگست 2025) — امریکی ریاست مونٹانا کے کالی اسپیل سٹی ایئرپورٹ پر ایک چھوٹے طیارے کی لینڈنگ کے دوران دیگر کھڑے جہازوں سے تصادم کے باعث آگ بھڑک اٹھی، تاہم اس واقعے میں کوئی جانی نقصان نہیں ہوا۔
غیر ملکی میڈیا رپورٹس کے مطابق یہ حادثہ پیر کی دوپہر تقریباً دو بجے پیش آیا جب سنگل انجن سُکاتا ٹی بی ایم 700 ٹربو پراپ طیارہ، جس میں چار افراد سوار تھے، لینڈ کرنے کی کوشش کے دوران کنٹرول کھو بیٹھا اور رن وے پر موجود کئی دیگر طیاروں سے جا ٹکرایا۔
تصادم کے نتیجے میں کئی طیاروں میں آگ لگ گئی جو قریبی گھاس کے علاقے تک پھیل گئی، لیکن فائر بریگیڈ کی بروقت کارروائی سے شعلوں پر قابو پا لیا گیا۔
کالی اسپیل ایئرپورٹ کے فائر چیف جے ہیگن نے بتایا کہ طیارے میں سوار تمام مسافر اپنی مدد آپ کے تحت محفوظ طریقے سے باہر نکلنے میں کامیاب ہوئے۔ اس حادثے میں دو افراد معمولی زخمی ہوئے جنہیں فوری طبی امداد فراہم کی گئی۔
امریکی پولیس اور وفاقی ایوی ایشن ایڈمنسٹریشن (FAA) واقعے کی تحقیقات کر رہی ہے تاکہ حادثے کی وجوہات معلوم کی جا سکیں۔
