برمنگھم، 9 اگست 2025 — پاکستان کے ہائی کمشنر برائے برطانیہ، ڈاکٹر محمد فیصل نے اپنی اہلیہ ڈاکٹر سارہ نعیم کے ہمراہ ایک پروقار تقریب میں ’اسپرٹ آف پاکستان‘ آزادی تقریبات کا افتتاح کیا۔ یہ تقریبات پاکستان کے قونصل خانہ برمنگھم کے زیر اہتمام 8 سے 15 اگست تک جاری رہیں گی۔
ان تقریبات کا مقصد برطانوی پاکستانیوں کی برطانیہ میں سماجی، ثقافتی اور قومی خدمات کو اجاگر کرنا اور انہیں بھرپور خراجِ تحسین پیش کرنا ہے۔ اس سال کا تھیم "معرکۂ حق کی کامیابی” اور پاکستان کی بہادر مسلح افواج کو خراج عقیدت پیش کرنے پر مبنی ہے۔
نمایاں شرکاء
افتتاحی تقریب میں اہم برطانوی و پاکستانی شخصیات نے شرکت کی، جن میں شامل تھے:
بیرونس شاہستہ گوہر OBE
رکن پارلیمنٹ پالیٹ ہیملٹن
رکن پارلیمنٹ طاہر علی
رکن پارلیمنٹ ایوب خان
سابق رکن پارلیمنٹ خالد محمود
لارڈ میئر آف برمنگھم ظفر اقبال MBE
چیئرمین اسپرٹ آف پاکستان کونسلر وسیم ظفر MBE
میئر آف ویسٹ مڈلینڈز رچرڈ پارکر
برمنگھم سٹی یونیورسٹی کے وائس چانسلر پروفیسر ڈیوڈ مبا
اس کے علاوہ مختلف کمیونٹی رہنماؤں، سفارتکاروں، کاروباری شخصیات اور پاکستانی نژاد برطانوی کمیونٹی کے سینکڑوں افراد نے بھی تقریب میں شرکت کی۔
ڈاکٹر محمد فیصل کا خطاب
تقریب سے خطاب کرتے ہوئے ڈاکٹر فیصل نے کہا:
"’اسپرٹ آف پاکستان‘ کی تقریبات کا مقصد نہ صرف ہماری ثقافت، اقدار اور قومی ورثے کو فروغ دینا ہے، بلکہ برطانیہ میں مقیم پاکستانی کمیونٹی کی ان تھک محنت، خدمات اور کامیابیوں کو تسلیم کرنا بھی ہے۔”
انہوں نے مزید کہا کہ برطانیہ میں پاکستانی کمیونٹی کی آبادی 17 لاکھ سے زائد ہے، جو ملک کی دوسری سب سے بڑی نسلی اقلیت ہے۔ یہ کمیونٹی کاروبار، تعلیم، سیاست، طب اور عوامی خدمت کے ہر میدان میں نمایاں کردار ادا کر رہی ہے۔
کمیونٹی کا اعتراف
تقریب میں برطانوی ارکانِ پارلیمنٹ اور کمیونٹی رہنماؤں نے بھی اظہارِ خیال کیا اور پاکستانی نژاد برطانوی شہریوں کی سماجی، ثقافتی اور معاشی خدمات کو سراہا۔ مقررین نے کمیونٹی کے درمیان اتحاد، تعلیم، اور مقامی سطح پر نمائندگی کی مزید ضرورت پر زور دیا۔
