کراچی / بھٹ شاہ (نیوز ڈیسک) — سندھ حکومت نے عظیم صوفی شاعر حضرت شاہ عبداللطیف بھٹائیؒ کے 282ویں سالانہ عرس کے موقع پر 9 اگست بروز جمعہ کو صوبے بھر میں عام تعطیل کا اعلان کر دیا ہے۔ اس حوالے سے محکمہ ثقافت سندھ کی جانب سے باقاعدہ نوٹیفکیشن جاری کر دیا گیا ہے۔
تین روزہ عرس کی تقریبات کا آغاز
عرس کی تقریبات جمعہ 9 اگست سے تاریخی شہر بھٹ شاہ میں شروع ہوں گی، جہاں ملک بھر سے ہزاروں زائرین، اسکالرز، شعرا اور عقیدت مندوں کی آمد متوقع ہے۔ روحانیت، ثقافت اور ادب سے جڑی یہ تقریبات تین روز تک جاری رہیں گی، جن میں محفل سماع، صوفی مشاعرہ، صوفی میوزک اور علمی نشستیں شامل ہوں گی۔
تیاریاں مکمل، سیکیورٹی پلان بھی تیار
سیکریٹری ثقافت سندھ محمد خان کلہوڑو کے مطابق عرس کی تمام انتظامات مکمل کر لیے گئے ہیں۔ سیکیورٹی کے حوالے سے ڈپٹی کمشنر حیدرآباد کی نگرانی میں فول پروف سیکیورٹی پلان ترتیب دیا گیا ہے تاکہ زائرین کو مکمل تحفظ فراہم کیا جا سکے۔
دوسری جانب وزیر ثقافت سندھ نے گورنر سندھ کو عرس کی افتتاحی تقریب میں شرکت کی باضابطہ دعوت بھی دے دی ہے۔
صوفی ورثہ، امن و محبت کا پیغام
عرس حضرت شاہ عبداللطیف بھٹائیؒ نہ صرف سندھ بلکہ پورے پاکستان میں صوفی ثقافت، محبت، رواداری اور امن کا استعارہ سمجھا جاتا ہے۔ ہر سال کی طرح اس بار بھی عرس کی تقریبات میں بھٹائی کے پیغام کو اجاگر کرنے پر زور دیا جائے گا۔
