لندن (بین الاقوامی نیوز ڈیسک) — برطانیہ میں شرح سود میں نمایاں کمی ریکارڈ کی گئی ہے، جو گزشتہ دو سال سے زائد عرصے کی کم ترین سطح پر آ گئی ہے۔
غیر ملکی خبر رساں اداروں کے مطابق برطانوی سینٹرل بینک نے شرح سود میں 0.25 فیصد کی کمی کا اعلان کیا ہے، جس کے بعد موجودہ شرح سود 4 فیصد ہو گئی ہے۔ یہ کمی ایسے وقت میں سامنے آئی ہے جب ملک میں مہنگائی کے دباؤ میں کمی اور معاشی بحالی کے آثار نظر آ رہے ہیں۔
ماہرین کے مطابق شرح سود میں یہ تازہ کمی گزشتہ دو سال کے دوران سب سے نچلی سطح ہے، جو مختلف مالیاتی شعبوں پر براہِ راست اثر ڈالے گی۔
مارگیج اور کریڈٹ صارفین کو فائدہ، بچت کرنے والوں کیلئے منافع میں کمی
مالیاتی تجزیہ کاروں کا کہنا ہے کہ شرح سود میں کمی سے مارگیج ہولڈرز کو ریلیف ملے گا کیونکہ ان کے ماہانہ قرضوں کی اقساط کم ہو سکتی ہیں۔ اسی طرح کریڈٹ کارڈز پر شرح سود میں بھی کمی کا امکان ہے، جس سے قرض لینے والے افراد کو سہولت ملے گی۔
تاہم، دوسری جانب بچت اکاؤنٹس میں منافع کی شرح بھی کم ہونے کا امکان ہے، جس سے بچت کنندگان کو نسبتاً کم فائدہ حاصل ہوگا۔
ماہرین کا کہنا ہے کہ اگر موجودہ معاشی رجحان برقرار رہا تو برطانیہ میں مالیاتی پالیسی میں مزید نرمی کا امکان بھی ظاہر کیا جا سکتا ہے۔
