ایشیا کپ میں بابراعظم کی واپسی ہونی چاہیے، وہ اب بھی ٹیم کے لیے اہم ہیں: وسیم اکرم
لاہور (اسپورٹس ڈیسک):
پاکستان کرکٹ ٹیم کے سابق کپتان اور مایہ ناز آل راؤنڈر وسیم اکرم نے ایشیا کپ 2025 کے لیے بابر اعظم کی قومی ٹی ٹوئنٹی اسکواڈ میں واپسی کا پرزور مطالبہ کر دیا ہے۔ ان کے بقول، ایسے بڑے ٹورنامنٹس میں تجربہ کار کھلاڑیوں کی موجودگی ٹیم کے لیے فیصلہ کن ثابت ہوتی ہے۔
"اگر میرے اختیار میں ہوتا تو بابر کو فوراً ٹیم میں شامل کرتا” — وسیم اکرم
خصوصی گفتگو میں وسیم اکرم نے واضح کیا کہ بابر اعظم کو ٹیم سے فارم کی بنیاد پر نہیں بلکہ فیصلوں کی بنیاد پر باہر کیا گیا، اور اب جب کہ ٹیم کو سینئر بیٹر کی ضرورت ہے، بابر کی واپسی ناگزیر ہے۔
"بابر اعظم اب بھی دنیا کے بہترین بلے بازوں میں شامل ہیں، ان کے پاس ابھی بہت کرکٹ باقی ہے، اور وہ نہ صرف خود پرفارم کرتے ہیں بلکہ نوجوان کھلاڑیوں کو ساتھ لے کر چلنے کی صلاحیت بھی رکھتے ہیں۔”
"بابر کو نمبر 3 پر کھلایا جائے”
وسیم اکرم کا ماننا ہے کہ بابر اعظم کی آئیڈیل پوزیشن نمبر 3 ہے۔ ان کے مطابق:
"بابر نہ صرف رنز کی رفتار بڑھا سکتے ہیں بلکہ وہ میچ کی صورتحال کے مطابق خود کو ڈھالنے کی مکمل صلاحیت رکھتے ہیں۔ انہوں نے 2019 میں سمرسیٹ کے لیے 150 کے اسٹرائیک ریٹ سے رنز بنائے، جو ان کی T20 مہارت کا ثبوت ہے۔”
بابر اعظم کی آخری ٹی20 اننگز اور فخر زمان کی انجری
واضح رہے کہ بابر اعظم نے دسمبر 2024 میں جنوبی افریقہ کے خلاف اپنا آخری ٹی ٹوئنٹی میچ کھیلا تھا۔ تب انہیں اسٹرائیک ریٹ کے حوالے سے تنقید کا نشانہ بنایا گیا، جس کے بعد انہیں اسکواڈ سے باہر کر دیا گیا۔
تاہم اب جبکہ فخر زمان انجری کا شکار ہیں، بابر کی واپسی کی راہ دوبارہ کھلتی دکھائی دے رہی ہے۔
