چکری: بانی پاکستان تحریک انصاف کی ہمشیرہ علیمہ خان نے کہا ہے کہ ملک میں جمہوریت اور قانون کی بالادستی کے لیے عوام کا شعور بیدار ہو رہا ہے، اور یہی پاکستان کا روشن مستقبل ہے۔ ان کا کہنا تھا کہ عوام پُرامن احتجاج جیسے آئینی حقوق سے آگاہ ہو چکے ہیں، اور اب ان کا مطالبہ صرف انصاف، شفافیت اور بات چیت ہے۔
چکری انٹرچینج پر میڈیا سے گفتگو کرتے ہوئے علیمہ خان نے کہا کہ احتجاج کی کال دی گئی تھی، لیکن ایسا محسوس ہوا جیسے عوام کے بجائے پولیس کی موجودگی زیادہ ہو۔ انہوں نے کہا کہ یہ وقت ہے کہ حکومت سنجیدہ انداز میں جمہوری قوتوں سے بات کرے اور بانی تحریک انصاف سے جیل میں ملاقات کر کے مذاکرات کا آغاز کرے۔
ان کا کہنا تھا کہ بانی پی ٹی آئی کو جیل میں دو سال ہو چکے ہیں، لیکن اہلخانہ اور خواتین کو پُرامن احتجاج سے روکنے کی کوئی منطق سمجھ نہیں آ رہی۔ علیمہ خان نے دوٹوک الفاظ میں کہا کہ قانون کی حکمرانی کے لیے ان کی جدوجہد جاری رہے گی، اور وہ ہر سطح پر آئینی طریقے سے آواز بلند کرتی رہیں گی۔
انہوں نے زور دیا کہ اختلاف رائے اور پرامن احتجاج جمہوریت کا حسن ہے، اور قوم کو اپنے حقوق کے تحفظ کیلئے متحد ہو کر آگے بڑھنا ہو گا۔
