صبا قمر کو سانس لینے میں دشواری، اسپتال میں داخل کرنے کی وجہ سامنے آ گئی
لاہور: پاکستان شوبز انڈسٹری کی معروف اداکارہ صبا قمر کو حالیہ دنوں طبیعت خرابی کے باعث اسپتال میں داخل کیا گیا تھا، جس کی وجہ اب سامنے آ گئی ہے۔
ذرائع کے مطابق، صبا قمر کو شوٹنگ کے دوران اچانک طبیعت بگڑنے پر لاہور کے ایک نجی اسپتال منتقل کیا گیا، جہاں ان کا مکمل طبی معائنہ کیا گیا۔
اداکارہ کے اہلِ خانہ کا کہنا ہے کہ صبا قمر کو سانس لینے میں شدید دشواری اور دمہ کی شکایت لاحق ہوئی تھی، جس کی وجہ سے انہیں فوری طبی امداد کی ضرورت پڑی۔ اسپتال میں موجود ڈاکٹروں نے ان کے مختلف ٹیسٹ کیے اور مکمل آرام کا مشورہ دیا۔
ڈاکٹرز نے صبا قمر کو کم از کم ایک ماہ کا آرام کرنے کی ہدایت کی ہے تاکہ وہ مکمل طور پر صحتیاب ہو سکیں۔ ان کے اہل خانہ نے مداحوں سے صبا قمر کی جلد صحتیابی کے لیے دعا کی اپیل بھی کی ہے۔
صبا قمر پاکستان کی سب سے باصلاحیت اداکاراؤں میں شمار ہوتی ہیں اور انہوں نے حالیہ عرصے میں کئی مشہور ڈراموں اور فلموں میں اپنی اداکاری کے جوہر دکھائے ہیں۔ مداحوں کی جانب سے ان کے لیے نیک تمناؤں اور دعاؤں کا سلسلہ جاری ہے۔
