فخر زمان کی انجری، بابراعظم کی T20 اسکواڈ میں واپسی کا امکان
لاہور: پاکستان کرکٹ بورڈ (پی سی بی) نے فخر زمان کی فٹنس مسائل کے پیش نظر سابق کپتان بابراعظم کی قومی ٹی ٹوئنٹی اسکواڈ میں واپسی پر غور شروع کر دیا ہے۔ ذرائع کے مطابق بابراعظم کی واپسی آئندہ سہ فریقی سیریز اور ایشیا کپ 2025 کے لیے متوقع ہے۔
فخر زمان کو حالیہ ویسٹ انڈیز کے خلاف ٹی ٹوئنٹی سیریز کے دوران انجری کا سامنا کرنا پڑا، جس کے بعد وہ نہ صرف بقیہ ٹی ٹوئنٹی میچز بلکہ ون ڈے سیریز سے بھی باہر ہو چکے ہیں۔ پی سی بی نے انہیں فوری طور پر نیشنل کرکٹ اکیڈمی لاہور رپورٹ کرنے کی ہدایت دی ہے، جہاں وہ ری ہیب کے عمل سے گزریں گے۔
ذرائع کا کہنا ہے کہ فخر زمان کی ایشیا کپ میں شرکت غیر یقینی ہو چکی ہے اور بورڈ ان کی بحالی کے عمل پر گہری نظر رکھے ہوئے ہے۔ ممکنہ متبادل کے طور پر بابراعظم کا نام سرفہرست ہے، تاہم ان کی واپسی کا انحصار ویسٹ انڈیز کے خلاف ون ڈے سیریز میں کارکردگی پر ہوگا۔
قابل ذکر بات یہ ہے کہ حال ہی میں بابراعظم نے محمد رضوان اور نسیم شاہ کے ہمراہ چیئرمین پی سی بی محسن نقوی سے ویسٹ انڈیز کے خلاف دوسرے ٹی ٹوئنٹی میچ کے دوران ملاقات بھی کی، جسے ٹیم کے مستقبل کے حوالے سے اہم قرار دیا جا رہا ہے۔
ایشیا کپ 2025 کی تفصیلات:
ایشیا کپ 2025 کا آغاز 9 ستمبر کو افغانستان اور ہانگ کانگ کے درمیان میچ سے ہوگا۔
پاکستان کو گروپ اے میں بھارت، یو اے ای اور عمان کے ساتھ رکھا گیا ہے۔
گروپ بی میں بنگلہ دیش، افغانستان، سری لنکا اور ہانگ کانگ شامل ہیں۔
پاکستان اپنا پہلا میچ 12 ستمبر کو عمان کے خلاف کھیلے گا۔
روایتی حریف بھارت کے خلاف بڑا مقابلہ 14 ستمبر کو ہوگا۔
جبکہ گروپ مرحلے کا آخری میچ 17 ستمبر کو یو اے ای کے خلاف ہوگا۔
ایشیا کپ کے لیے حتمی اسکواڈ کا اعلان اگست کے دوسرے ہفتے میں متوقع ہے، جس میں بابراعظم کی شمولیت ایک اہم پیش رفت ثابت ہو سکتی ہے، خاص طور پر اگر وہ آنے والے میچز میں خود کو دوبارہ منوانے میں کامیاب ہو جائیں۔
