گلگت – وزیراعظم محمد شہباز شریف ایک روزہ سرکاری دورے پر گلگت پہنچ گئے ہیں جہاں ان کا استقبال گلگت بلتستان کے گورنر سید مہدی شاہ، وزیر اعلیٰ گلبر خان، چیف سیکرٹری، آئی جی پولیس اور فورس کمانڈر نے کیا۔
وزیرِ مواصلات عبدالعلیم خان، وزیرِ اطلاعات و نشریات عطاء اللہ تارڑ، وزیرِ امور کشمیر و گلگت بلتستان انجینئر امیر مقام، وزیر برائے موسمیاتی تبدیلی ڈاکٹر مصدق ملک، مشیر وزیرِ اعظم رانا ثناء اللہ اور وزیرِ اعظم کے کوارڈینیٹر شبیر عثمانی بھی وزیراعظم کے ہمراہ ہیں۔
وزیراعظم شہباز شریف گلگت میں حالیہ بارشوں اور سیلاب سے متاثرہ علاقوں کا دورہ کریں گے، متاثرین سے ملاقات کے بعد امدادی رقوم تقسیم کریں گے۔ انہیں گلگت بلتستان میں بارشوں کے باعث ہونے والے نقصانات کی تفصیلی بریفنگ دی جائے گی۔
گلگت بلتستان حکومت کے ترجمان فیض اللہ فراق کا کہنا ہے کہ سیلاب سے گلگت بلتستان کو 20 ارب روپے سے زائد کا نقصان پہنچا ہے اور متاثرین کی تمام امیدیں وفاقی حکومت کی طرف ہیں۔ انہوں نے کہا کہ وزیراعظم کا دورہ گلگت بلتستان کے لیے نیک شگون ثابت ہوگا اور متاثرین کی مشکلات کم کرنے میں مددگار ہوگا۔
