اسلام آباد: وزارتِ مذہبی امور نے حج 2026 کی تیاریوں کا باقاعدہ آغاز کر دیا ہے، جس کے تحت عازمینِ حج سے واجبات کی پہلی قسط کی وصولی کا عمل آج سے شروع ہو گیا ہے۔ وزارت کے مطابق حج کے خواہشمند افراد نامزد بینکوں یا آن لائن پورٹل کے ذریعے اپنی درخواستیں جمع کرا سکتے ہیں۔
رجسٹریشن کا عمل ’’پہلے آئیے، پہلے پائیے‘‘ کی بنیاد پر جاری ہے، اور پہلی قسط 9 اگست تک جمع کروائی جا سکتی ہے۔ وزارت کا کہنا ہے کہ نشستیں دستیاب ہونے کی صورت میں 11 سے 16 اگست تک نئے عازمین بھی درخواست دے سکیں گے۔
حج 2026 کے لیے پیکج کا تخمینہ ساڑھے 11 لاکھ سے ساڑھے 12 لاکھ روپے کے درمیان رکھا گیا ہے، جب کہ دوسری قسط کی وصولی یکم نومبر سے شروع ہو گی۔
ایک اہم پیشرفت کے طور پر، وزارت نے دوبارہ حج کرنے اور عمر کی بالائی حد کی پابندی ختم کر دی ہے، جو ان افراد کے لیے خوشخبری ہے جو پہلے بھی حج کر چکے ہیں یا عمر کی وجہ سے رکاوٹ کا سامنا کر رہے تھے۔
تاہم، وزارت نے واضح کیا ہے کہ یکم مارچ 2014 کے بعد پیدا ہونے والے بچے حج کے لیے اہل نہیں ہوں گے۔
