پاکستان تحریک انصاف (پی ٹی آئی) کے رکن قومی اسمبلی شیر افضل مروت نے پارٹی قیادت پر شدید تنقید کرتے ہوئے علیمہ خان اور سلمان راجہ کو پارٹی سے نکالنے کا مطالبہ کر دیا ہے۔
سماجی رابطے کی ویب سائٹ ایکس (سابقہ ٹوئٹر) پر جاری ایک بیان میں شیر افضل مروت نے کہا کہ "علیمہ خان نے پارٹی کو 9 مئی جیسے حالات سے دوچار کر دیا ہے۔” انہوں نے مزید کہا کہ وہ عمران خان کے لیے اپنا کردار ادا کرنا چاہتے ہیں، مگر عوام اور خود کے درمیان کسی قسم کی مداخلت برداشت نہیں کریں گے، بالکل اسی طرح جیسے 9 مئی کے بعد انہوں نے احتجاج کی قیادت کی تھی۔
شیر افضل مروت نے اعلان کیا کہ "مجھے پورے پاکستان میں عوام کو متحرک کرنے کے لیے کم از کم ایک ماہ درکار ہے، اس لیے احتجاج کو نئی تاریخ دینا ہوگی۔” انہوں نے پارٹی سے مطالبہ کیا کہ ان کے ساتھ کی گئی "ناانصافی اور بے عزتی” پر معافی مانگی جائے۔
انہوں نے کہا کہ "علیمہ خان، سلمان راجہ سمیت سازشی گروہ کو پارٹی سے فوری طور پر نکالا جائے۔” انہوں نے کارکنان سے اپیل کی کہ وہ پارٹی پر دباؤ ڈالیں تاکہ ان عناصر کو فارغ کیا جا سکے۔
شیر افضل مروت نے اپنا مؤقف واضح کرتے ہوئے کہا: "اگر میں ناکام ہوا تو ہمیشہ کے لیے سیاست سے کنارہ کش ہو جاؤں گا۔”
یہ بیان پی ٹی آئی کے اندرونی اختلافات اور گروپ بندی کی نشاندہی کرتا ہے، اور آنے والے دنوں میں پارٹی کے اندر مزید ہلچل کا باعث بن سکتا ہے۔
