ندا یاسر کا خواتین کو کامیاب شادی کے لیے آزمودہ مشورہ — "شوہر کے دل تک رسائی دماغ کے راستے سے ممکن ہے”
کراچی: پاکستان کی معروف مارننگ شو میزبان اور اداکارہ ندا یاسر نے حالیہ پروگرام میں خوشگوار ازدواجی زندگی کے لیے خواتین کو ایک دلچسپ اور نفسیاتی پہلو پر مبنی مشورہ دیا، جسے سوشل میڈیا صارفین نہایت توجہ سے سن رہے ہیں۔
مارننگ شو میں اداکارہ ونیزہ احمد، اداکار فیضان شیخ اور ایک ماہرِ نفسیات کو مدعو کیا گیا تھا، جہاں ازدواجی تعلقات، مزاجی ہم آہنگی اور ایک دوسرے کو سمجھنے کے موضوع پر سیر حاصل گفتگو کی گئی۔
گفتگو کے دوران ندا یاسر نے کہا:
"آپ نے ضرور نوٹ کیا ہوگا کہ کچھ خواتین اپنے شوہروں کو بہت آرام سے کنٹرول میں رکھتی ہیں، اس کی وجہ یہ ہے کہ وہ اپنے شوہر کی نفسیات کو مکمل طور پر سمجھ چکی ہوتی ہیں۔”
انہوں نے ایک ذاتی مثال بھی شیئر کی:
"ہماری جاننے والی ایک خاتون نے شوہر کی نفسیات کو اتنی اچھی طرح سمجھا ہے کہ اب وہ اس کا بدمزہ کھانا بھی خوشی سے کھاتا ہے!”
ندا یاسر نے خواتین کو مشورہ دیتے ہوئے کہا:
"اگر آپ چاہتی ہیں کہ آپ کا شوہر آپ کے زیرِ اثر رہے تو سب سے پہلے اس کے دماغ اور رویے کو سمجھنا سیکھیں، پھر وہ آپ کی بات کو بھی اہمیت دے گا اور دل سے تعلق قائم ہوگا۔”
ندا یاسر کے اس دوستانہ اور حقیقت پسندانہ مشورے کو ناظرین نے نہ صرف دلچسپ قرار دیا بلکہ سوشل میڈیا پر بہت سے افراد نے اس پر تبصرے بھی کیے کہ تعلقات کی بنیاد صرف محبت نہیں، بلکہ ایک دوسرے کو سمجھنا بھی ہے۔
