اسلام آباد: پاکستان تحریک انصاف (پی ٹی آئی) کے سینئر رہنما اور سابق وفاقی وزیر حماد اظہر نے 9 مئی کے مقدمات میں پولیس کو گرفتاری دینے سے انکار کر دیا ہے۔ ذرائع کے مطابق، انہوں نے اپنی قانونی ٹیم سے مشاورت کے بعد فیصلہ کیا ہے کہ پہلے پشاور ہائیکورٹ سے حفاظتی ضمانت حاصل کریں گے، اور بعد ازاں متعلقہ عدالتوں سے ضمانت کے لیے رجوع کریں گے۔
حماد اظہر کے خلاف لاہور، فیصل آباد، اسلام آباد اور دیگر شہروں میں 50 سے زائد مقدمات درج ہیں جن میں وہ متعدد بار اشتہاری قرار دیے جا چکے ہیں اور پولیس کو مطلوب ہیں۔ قانونی ٹیم نے مقدمات کا مکمل ریکارڈ اکٹھا کر لیا ہے اور حفاظتی ضمانت کی درخواست دائر کرنے کی تیاری مکمل کر لی ہے۔
ذرائع کا کہنا ہے کہ حماد اظہر جلد ہی پشاور ہائیکورٹ کے سامنے پیش ہو کر حفاظتی ضمانت حاصل کرنے کی کوشش کریں گے تاکہ قانونی عمل کے تحت مقدمات کا سامنا کیا جا سکے۔
واضح رہے کہ حماد اظہر تقریباً دو سال سے روپوش تھے اور 9 مئی کے پرتشدد واقعات کے بعد سے سکیورٹی اداروں کی نظروں سے اوجھل تھے۔ والد کے انتقال کے بعد انہوں نے اپنی روپوشی ختم کرنے کا عندیہ دیا تھا، تاہم گرفتاری کے بجائے قانونی راستہ اختیار کرنے کا فیصلہ کیا ہے۔
