اسلام آباد: پاکستان اور امریکا کے درمیان تاریخی تجارتی اور توانائی شراکت داری کے معاہدے پر نائب وزیراعظم و وزیر خزانہ اسحاق ڈار نے اظہارِ اطمینان کرتے ہوئے کہا ہے کہ ’’الحمدللہ، پاکستان کا امریکا کے ساتھ تاریخی معاہدہ طے پا گیا ہے۔‘‘
یہ بیان انہوں نے امریکی صدر ڈونلڈ ٹرمپ کی سوشل میڈیا پر جاری کردہ پوسٹ کے جواب میں جاری کیا، جس میں صدر ٹرمپ نے اعلان کیا تھا کہ پاکستان کے ساتھ تجارتی معاہدہ مکمل ہو چکا ہے اور دونوں ممالک توانائی کے شعبے میں قریبی اشتراک پر کام کریں گے۔
اسحاق ڈار نے اپنے بیان میں کہا کہ یہ معاہدہ نہ صرف دونوں ممالک کے درمیان معاشی تعاون کو فروغ دے گا، بلکہ توانائی، بنیادی ڈھانچے اور سرمایہ کاری کے نئے مواقع بھی پیدا کرے گا۔ انہوں نے کہا کہ پاکستان اب اپنی معاشی پوزیشن کو مستحکم بنانے کی راہ پر گامزن ہے۔
وزیر خزانہ نے اس پیش رفت کو "معاشی ڈپلومیسی کی کامیابی” قرار دیتے ہوئے کہا کہ حکومت پاکستان نے ہمیشہ قومی مفاد کو مقدم رکھتے ہوئے بین الاقوامی سطح پر معاشی شراکت داری کو فروغ دیا ہے، اور یہ معاہدہ اسی حکمت عملی کا عملی ثبوت ہے۔
اسحاق ڈار نے وزیراعظم شہباز شریف کی قیادت کو سراہتے ہوئے کہا کہ عالمی سطح پر پاکستان کا وقار بحال ہو رہا ہے اور یہ معاہدہ ایک نئے دور کا آغاز ثابت ہوگا۔
حکومتی ذرائع کے مطابق، معاہدے کی مکمل تفصیلات آئندہ دنوں میں جاری کی جائیں گی، تاہم ابتدائی اطلاعات کے مطابق یہ شراکت داری توانائی، بنیادی ڈھانچے اور برآمدی مواقع کے فروغ میں کلیدی کردار ادا کرے گی۔
