اسلام آباد (سیاسی رپورٹر) – وزیر اعلیٰ خیبر پختونخوا علی امین گنڈاپور نے اعلان کیا ہے کہ وہ 5 اگست کو متوقع احتجاجی تحریک میں صوبہ خیبر پختونخوا میں قیادت کریں گے۔ ان کا کہنا ہے کہ ملک میں قانون حرکت میں نہیں، اور جو حالات بن چکے ہیں، ان کے خلاف عوامی ردعمل ضروری ہو چکا ہے۔
اسلام آباد میں میڈیا سے گفتگو کرتے ہوئے گنڈاپور نے کہا کہ:
"یہ جھوٹے اور من گھڑت کیسز کافی عرصے سے چل رہے ہیں۔ ہم نے ہمیشہ قانون کا سامنا کیا ہے، اور ایسی پیشیوں سے کبھی گھبرائے نہیں۔”
انہوں نے مزید کہا کہ بانی تحریک انصاف "اس جنگ کو اپنی ذات سے بڑھ کر قوم کی جنگ” سمجھ کر لڑ رہے ہیں، اور یہ لڑائی "قانون کی بالادستی اور بنیادی حقوق” کے لیے ہے۔
گنڈاپور نے عوامی شرکت کی اپیل کرتے ہوئے کہا:
"5 اگست کو خیبر پختونخوا کے ہر ضلع اور ہر حلقے سے لوگ باہر نکلیں گے۔ ہم نااہلیوں، انتقامی کارروائیوں اور گرفتاریوں سے گھبرانے والے نہیں۔”
انہوں نے واضح کیا کہ خیبر پختونخوا کی حکومت پرامن احتجاج کے حق کو تسلیم کرتی ہے اور شہریوں کے جمہوری حقوق کے تحفظ کے لیے پرعزم ہے۔
