پشاور: مشیر اطلاعات خیبر پختونخوا بیرسٹر ڈاکٹر سیف نے اعلان کیا ہے کہ 5 اگست حکومت کے لیے ایک بڑا سرپرائز دن ثابت ہوگا۔ انہوں نے کہا کہ عمران خان کی ہدایت پر پورے ملک خصوصاً خیبر پختونخوا میں بھرپور اور منظم تیاریاں جاری ہیں جنہیں دیکھ کر حکومت کی ٹانگیں کانپ رہی ہیں۔
بیرسٹر ڈاکٹر سیف نے بتایا کہ صوبے کے وزیر اعلیٰ علی امین گنڈاپور خود تمام انتظامات کی نگرانی کر رہے ہیں تاکہ ہر سطح پر کسی قسم کی کوتاہی نہ ہو۔ انہوں نے واضح کیا کہ اگر حکومت نے 26 نومبر جیسے کسی بھی ہتھکنڈے کو دہرانے کی کوشش کی تو اس بار عوام بھرپور اور منہ توڑ جواب دیں گے۔
مزید برآں، مشیر اطلاعات نے اس بات پر زور دیا کہ پرامن احتجاج ہر شہری کا آئینی، قانونی اور جمہوری حق ہے جسے کوئی بھی طاقت چھین نہیں سکتی۔ انہوں نے کہا کہ خیبر پختونخوا کی حکومت اور عوام غیر آئینی اقدامات کے خلاف قانونی اور سیاسی سطح پر بھرپور مزاحمت کریں گے۔
بیرسٹر ڈاکٹر سیف کا کہنا تھا کہ 5 اگست کو ملک بھر میں ہونے والی سرگرمیاں ملک کے سیاسی منظرنامے میں ایک نیا موڑ ثابت ہوں گی اور حکومت کو اس کے نتائج کا سامنا کرنا پڑے گا۔
