اسلام آباد: ملک بھر کے صارفین کے لیے بجلی کی قیمت میں فی یونٹ ایک روپے 75 پیسے کمی کا امکان ظاہر کیا جا رہا ہے۔ یہ پیش رفت سی پی پی اے (پاور پالیسی پراکیورمنٹ ایجنسی) کی جانب سے مالی سال 2024-25 کی چوتھی سہ ماہی کی مد میں درخواست دائر کرنے کے بعد سامنے آئی ہے۔
سی پی پی اے نے سہہ ماہی ایڈجسٹمنٹ کی مد میں درخواست دی ہے جس کے منظور ہونے کی صورت میں صارفین کو مجموعی طور پر 53 ارب 39 کروڑ روپے سے زائد کا ریلیف مل سکے گا۔ یہ ایڈجسٹمنٹ ملک کی تمام ڈسٹری بیوشن کمپنیز (ڈسکوز) بشمول کے الیکٹرک پر بھی لاگو ہوگی۔
نیپرا (نیشنل الیکٹرک پاور ریگولیٹری اتھارٹی) سی پی پی اے کی درخواست پر 4 اگست کو سماعت کرے گا، جس کے بعد قیمتوں کے حوالے سے حتمی فیصلہ کیا جائے گا۔ اگر درخواست ستمبر، اکتوبر اور نومبر کی سہہ ماہی کے لیے بھی منظور ہو جاتی ہے تو صارفین کو فی یونٹ 2 روپے 10 پیسے تک کی کمی سے مزید ریلیف ملنے کا امکان ہے۔
یہ اقدام بجلی کے نرخوں میں کمی کی صورت میں صارفین کی معاشی صورتحال میں بہتری اور بجلی کے بلوں میں کمی کا باعث بنے گا۔
